سیاسەتمەدارەکێ عیراقی: ھەرێما کوردستانێ خودان ئیدارەکا سەرکەفتی یە
ئەڤرۆ:
سیاسەتەمەدارەکێ عیراقی راگەھاند، ھەرێما کوردستانێ خودان ئیرادە و ئیدارەکا سەرکەفتی بوو، لەوما حوکمەتا عیراقێ یا ژ حوکمەتا ھەرێما کوردستانێ فێری ئیدارەکرن و سیاسەتێ بووی.
سەبارەت رەوشا عیراقێ و پەیوەندیێن ھەرێما کوردستانێ ل گەل بەغدا، کازم ئەلجحێشی، سیاسەتمەدارێ عیراقی گۆت” حوکمەتا عیراقی یا فیدرال د ھەموو رێککەفتنێن خوە ل گەل ھەرێما کوردستانێ ژ ٢٠٠٣ وھەتا نوکە و ل دەمێ دستوور ھاتیە نڤێسین ھەتا ئەڤرۆ، ھەموو سەرکردە و سیاسەتمەدار ژی ل ھەولێرێ و کوردستانێ روو ل کوردان دکەن ب تایبەتی ژی ل دەمێ ھەلبژارتنان نێزیکی وان دبن”.
کازم ئەلجحێشی زێدەتر گۆت” ھندەک لایەن دەمێ دبنە خودان پلە و پایە، ھەموو رێککەفتنان پشت گوە دھاڤێژن، گەلەک بەلگە ل سەر ڤێ چەندێ یێن ھەین، بۆ نموونە ھەلویستێ پێشمەرگەی ژ دستوورێ و قانوونێ و مووچێن وان، ھەروەسا مووچێن فەرمانبەران و ھەموو ئیمتیازاتێن تایبەت ب ھەرێما کوردستانێ ل بەغدا کو پاشی دبینین حوکمەتا فیدرال رێگریان بۆ وان ھەموو رێککەفتنان دروست دکەت”.
دیارکر ژی” کورد و نەتەوا کوردی خودان ئیرادەکا ب ھێزن، د سیاسەتکرن و ئیدارەکرنێ دا ژی نموونا دیار یا ھەموو عیراقێ نە، ھەڤدەم عیراقی ژی ئەگەر خوە ژ وێ راستیێ نەدزن، باش وێ چەندێ دزانن”.
ئەلجحێشی ئاماژە کر” ژلایەکێ دی ڤە دبینین برایێن کورد ب زمانێ دستووری و ھژماران و قانوونێ دگەل حوکمەتا فیدرالی د ئاخڤن، بەلێ وەکو من دیارکری حوکمەتا فیدرال ل وێ رەوشا خوە ئەوا پەیرەو دکەت ل گەل سیاسەتمەدارێن کورد یا راھاتی، بەھانەیان بۆ کۆمەک تشتێن دی دئینن، وەکو رادەستکرنا ھەموو داھاتێ دەروازێن سنووری ل ھەرێما کوردستانێ و پەترۆلێ ھەرێمێ، ئەوا گونجای ژی بیت ھەرێما کوردستانێ یێ دایێ، بەلێ بەغدا ھەر جارەکێ بەربەستەکێ دئینیتە پێش، ئەڤە ژ بلی وێ چەندێ کو پشکەک ژ لایەنێن عیراقی ب شیعە و سوننە ڤە د بنڤە خودانێن ھزرا پەیداکرنا وان گرفتانە”.
د پشکەکا دی یا ئاخڤتنێن خوەدا، ئەو سیاسەتمەدارە لێکدانەکا دیار بۆ سەرەدانا (عەمار ئەلحەکیم) بۆ ھەرێما کوردستانێ دکەت و دبێژیت” سەبارەت سەرەدانا (عەمار ئەلحەکیم) بۆ ھەرێما کوردستانێ، وەکو بۆچوونا خوە دبێژم ئەو چەندە بۆ نێزیکبوونا ھەرێما کوردستانێ و بەغدا بوو، ب دیتنا من ئەو ھنارتیێ ئاشتیێ بوو ژ لایێ سیاسەتمەدارێن بەغدا ڤە، چونکە ئەو ھەست ب شەرمزاریێ دکەن بەرامبەر گەل و جادا عیراقی ب تایبەتی ژی ھەلبژارتن یێن نێزیک بووین، لەوما دبینین نوکە (عەمار ئەلحەکیم) یێ بوویە پەیاما ئاشتیێ د ناڤبەرا بەغدا و ھەرێما کوردستانێ دا”.
