سیاسەتێ نە بەرە و نە پشت!
محەمەد مـراد
ئیرانێ خۆ دیاركر، دەولەتەكا ب هێزە و جیهان چاڤەرێ بوو ئیران د شەڤەك و رۆژەكان دا ژناڤبچیت، نە هەرێ بوو خەون، سەخمەراتی ئابلۆقا دەهان سالان ل سەر ئیرانێ، ئیرانێ یا شیای ژ هەمی لایەكێ ڤە خۆئاڤا بكەت و باشترین چەك دورست بكەت و بەرگریێ ژ خۆ بكەت و گەفان ژی ل دەوروبەرێن خۆ بكەت.
سەخمەراتی وێ زولم و زۆری یا دەستهەلاتا ئیرانێ ل خەلكێ ئیرانێ و كوردان دكەت، لێ شییا خۆ رابگریت، ئەم چاڤەرێ بووین ئیران ژناڤبچیت، لێ مخابن زالتر لێهات ل سەر مللەتێ خۆ و دەورەبەران ژی، دبیت نێزیك نەدویر ژ بن ئابلۆقێن نیڤدەولی ژی دەربكەڤیت و ببیت هەڤالبەندا ئەمریكا، پشتی هەڤالبەندا وێ یا سەرەكی ڕۆسیا پشتا خۆ دایێ د ڤی شەری دا.
هەر چەندە خوسارەتیەكا مەزن د ڤی شەڕی دا ئیرانێ دا، تایبەتی كوشتنا پتری ژ دوازدە زانایێن ئەتۆمی و دەهان سەركردەیێن ب هێز یێن لەشكری، لێ ئیرانێ خۆ راگرت، خۆراگری و نەسەرهلدانا خەلكی د ڤێ ئابلۆقا ئابۆری دا سەركەفتنە بۆ رژێما ئیرانێ و دێ ئیران دژوارتر لێ هێت، تایبەتی د ناڤخۆیا خۆ دا، دێ ئاسنی ب ساری چەمینن ناهلیت هیچ دەنگێن نەرازی بەرامبەری وێ سەرێ خۆ راكەن، ئانكو مللەتێ وی دێ كەڤیت دبن زولم و زۆردایەكا گەلەك مەزنتر ژ بەری شەڕی دا، چنكو د لێدانا ئیرانێ دا گەلەك دەنگێن نەرازی د جادەیا وێ دا سەرهلدان و گەلەك هەر زوی ڤەمراندن ب هێجەتا هندێ كو دەست ل گەل مووسادێ هەبوو و كرنە سیخور و ژناڤبرن.
دێ یا بەردەوام بیت ل سەر كوشتن و سێدارەدانا خەلكێ سادە ئەو دەربێن ب ئیرانێ كەڤتین دەهان سالێن دی ژی ژ لایێ لەشكری ڤە ناگەهیتە وی ئاستێ بەری شەڕی، چنكو ژێرخانا وێ یا لەشكری یا ژناڤبری و هەر سێ بنگەهێن سەرەكی ژی یێن چێكرنا یۆرانیۆمێ ژناڤبرینە، دەهان سالێن دی ژی نەشێت وان بنگەهێن ئەتۆمی ئاڤا بكەت.
ئێران دێ ڤی ماوەی دا دێ هەمی هەولان دەت، پەیوەندیێن نیڤدوەلی ل گەل ئەمریكا و ودەولەتێنن دژی وێ خۆش كەت، تنێ دا دەستهەلاتا مەلەیان لی بمینن سەر دەسهەلاتێ و ئابلۆقا ئابۆری ژی سەر ئیرانێ راكەن پشتی نەمانا چەكێ ئەتۆمی، بۆ جیهانێ ژی ئاشكرا بوو، ئەگەر چەكێ ئەتۆمی ئیرانێ هەبا بێ دودلی دا ئیسرایلێ ژ نەخشێ جوگرافی ئینن دەرێ و ژ سەر جیهانێ سڕكە، بەلێ نەبوو، یان چەندەك دی مابا دا گەهن چەكێ ئەتۆمی.
لێ ئیسرائیلێ نەهێلا بگەهیت چەكێ ئەتۆمی، چنكو دزانی هەردەمێ ئیران ببیت خودانێ ئیِك بومبا ئەتۆمی، دێ ل ناڤ جەرگێ ئیسرائیلێ دەت، ئیران ژ لایێ خۆ راگری ڤە سەركەفت، لێ خوزیكێن مە.
ئەو نەبوون، مەدڤیا دەستهەلاتا ئەڤە چل و پێنج سالە ل سەر دەستهەلاتێ ژناڤ بچیت، دا وەلاتێن دەوربەر ئارام ببان لێ، ژناڤ نەچوو، ئەمریكا و تایبەتی ترامپی لەز ل رێكەفتێ كر، بۆ خاترا وەرگرتنا مەدالیەكێ، ئەوژێ مسۆگەر نینە، بەلێ خۆش هێجەت بوو شەڕ راوەستاندنێ، ئەو شەڕێ وی هەلكری و ئەوی ڤەمراند، بوو قەهرەمانێ ئاشتیێ لەو دبێژن سیاسەتێ نە بەرە و نەپشتە.
