سیبەرا رویباری
هێلین سالم
ل گوندەکێ بچویک ل بنارێ چیایەکێ رویبارەکێ بۆش هەبوو، زەلامەکێ دانعەمر بناڤێ سەگڤان لوێرێ ب ژیانەکا سادە دژیا و چاڤدێریا باخچەکی دکر و گوهێ خۆ ددا شڕشڕا ئاڤا رویباری، بۆ سەگڤانی ئەو نە بتنێ رویبارەک بۆ بەلکو خۆدیکەک بوو کو خۆ تێدا ددیت و خەم و ئێشێن خۆ پێ ژبیرڤە دبرن.
رۆژەکێ سەگڤانی تێبینی کر کو ئاڤا رویباری یا هاتیە گوهۆڕین و وەکی بەرێ هێزا وی نەمایە، سەگڤان گەلەک خەمگین بوو، ئەو تێگەهشت کو رویبار وەکی ژیانێ یە د قۆناغێن خۆش و نەخۆش دا دەرباز دبیت.
سەگڤانی دەست ب ڤەکۆلین و گەریانا کر دا بزانیت برچی ئاڤا رویباری کێم بوویە و بەرەڤ چاڤکانیا رویباری چوو و دیت سكرەكی مەزن یێ لسەر رویباری هاتیە دروستکرن، سەگڤان پتر خەمبار بوو لێ یێ لسەر خۆ زال بوو ودەست نە داهێلان و بریاردا کارەکی بکەت، دەست ب کۆلانا جۆیەکا مەزن ل رەخەکێ سكری كر؛ دا ئاڤ بۆ رێکا خۆ یا سروشتی بزڤڕیت، حەفتیەکێ لسەر ئەڤی کاری و لبەر تیشکا رۆژێ و سەرمایا شەڤێ یێ بەردەوام بوو.
ل دووماهیێ، سەگڤانی سەرکەفتن بدەستڤە ئینا و جارەکادی هێز و ژیان بۆ رویباری زڤرینە ڤە، خۆشییەکا مەزن ب سەر دلێ سەگڤانی دا هات و تێگەهشت کو حەتا کەسەکێ لاواز و دانعەمر ژی دشێت گوهۆڕینێن مەزن د ژیانێ دا بکەت.
دوبارە ژیان زڤڕی گوندی و رویبار بۆ نیشانا هیڤیێن نوی و شیانێن گوهۆڕینا، سەگڤان فێربوو کو حەتا ل دژوارترین کاوداندا دڤێت هەردەم مرۆڤی هیڤییەک هەبیت بۆ ڤەگەریانا هێزێ و جوانیێ.
بهێنفرەهی و بزاڤ دشێن گوهۆڕین و بریارێن دروست بدەن و هەمی کەسا شیانێن گوهۆڕینێن باش ل جیهانێ و دەور و بەرێن خۆ هەنە.
