سیبەرا پشیكا سۆر
سۆلین لەوەند شكاك
پشیكا سۆر یا بێ سیبەر بوو، بەلێ هەر جهەكێ دچوویێ، سیبەرەكا نە وەكو چ سیبەران ژێ دما.. سیبەرەك، كو شێوەیێ وێ چ جاران یێ جهگر نەبوو. هندەك جاران وەكی پەلاتینكا د فڕینێ دا بوو، جاران ژی وەكی زەلامەكێ دكرە گری و جارنا ژی وەكی ژنەكێ بوو، كو دكەنی.
رۆژەكێ كچكەكا بچویك ل دویڤ پشیكێ بەزی، دەمێ گەهشتیێ، دەستێ خۆ دا سیبەرا وێ. ژ نشكەكێڤە سیبەر وەرگەڕیا بوو سەر شێوەیێ كچكەكا بچویك، راست وەكو وێ. پشیكێ تەماشەی وێ كر و گۆت:
– چ جاران دەست نەدە سیبەران، چونكی سیبەر هندەك تشتان نیشان ددەن، كو تو هێشتا نە یا ئامادەی وان ببینی.
كچك ژ ترسا بەر ب مال ڤە ڕەڤی، بەلێ ژ وێ ڕۆژێ و وەرە، هەر دەمێ تەماشەی خودیكێ دكر، ل شوینا روویێ خۆ، سیبەرەك ددیت، كو ب وێ دكەتە كەنی.
