سیتافک
نایف مەحموود
ئەو سیتافکا
ژ دارێ بەژنا وێ هاتی
سیبەرا وەرزێ بهارێ دگەل خوە ئینا..
تەڤ کولیلک و گول و نێرگز بشکڤاندن
بێهنا گولاڤێ ژێ ئینا
هەکو هاتی و هێژ ب ڕێڤە
پێژنا وێ هات ئەزێ د ڕێ دا، د بەندێ دا
سیتافکا وێ، تاڤیەکا بارانێ ئینا..
نازک باری، خوەشک هات و
خۆناڤا ل سەر داروباری
ب بەرڤە چووم، پەری و حۆری
چاڤ خەزالا ل ناڤ چیا
خودانا وان کەزی وبسک و تەمبەریا
سیتافکا وێ، بەختەکێ نوی بۆ من ئینا..
ڕند و شرین چ هەوار بوو
کەمەر زنجیر و زراڤ بوو
سیتافکا وێ، شەوق و شەفەق دابوو واری
ژ نوو گەهای، بەدەوا ل عەمرێ شویا
سەما خۆشی و مزگینیا
سیتافکا وێ، دیاری بوو
سۆزا عەشقا خوە بجهــ ئینا.
