سیداد باجلۆری ئەو گەنجە یێ راهێنەرێ هەلبژارتیێ ئیراقێ حێبەتی كری
قەیس وەیس:
یاریزانێ گەنج و خەلكێ باژێرێ دهۆكێ و ستێرێ تیما لاوێن یانەیا زاخۆ سیداد حەجی باجلۆری ئەوە بۆ ماوەیێ سێ سالە دگەل هەلبژارتیێ لاوێن ئیراقێ یا فوتبۆلێ یە و شیاییە ببیتە ئێك ژ یاریزانێن باوەرپێكری و راهێنەر پشتگەرمییا خوە ب شیانێن وی بكەت.
د داخویانیەكا رۆژنامەڤانی دا عیماد محەمەد راهێنەرێ هەلبژارتیێ لاوێن ئیراقێ دیاركر بەرهەڤیێن وان بۆ قارەمانییا رۆژئاڤا ئاسیا و ڤاڤارتنێن كۆپا كێشوەرێ ئاسیا بەردەوامن ئەوا دێ ل 21ێ هەتا 29ێ ئەیلۆنا بهێت دەستپێكەت، ئەڤە زێدەتری دو هەیڤە ب شێوەكێ جودا راهێنانێن خوە دكەین، ل سەر ئاستێ پێكهاتیێ تیما مە چەند یاریزانێن خودان شیان هەنە بووینە جهێ سەرسۆرمانێ ژبەر ئاست و شیانێن وان و دیار كر سیداد حەجی هێرشبەرەكێ بەهرەمەندە و خودان شیانە و دێ بیتە پاشەرۆژا گەش یا هەلبژارتیێ ئیراقێ، دگەل بەردەوامییا چاڤدانێ و راهێنانان دێ ئاستێ خوە بەردەوام پێشئێخن.
ژلایەكێ دووڤە بابێ سیدادی كو ئێك ژ وەرزشڤانێن دێرینێن پارێزگەها دهۆكێ یە بۆ رۆژنامەیا ئەڤرۆ خویا كر بوو د نوكە دا سیداد یێ پشكدارە د كەمپێ راهێنانێ یێ هەلبژارتیێ لاوێن ئیراقێ دا پشتی ژلایێ راهێنەرێ وی عیماد محەمەد بەری دو سالە هاتبوو داخواز كرن، ئەڤچەندە ژی دەرئەنجامێ ئاستێ و شیانێن وی دگەل یانەیا زاخۆ د خولا پلا نایاب دا بوو، پشكدارییا وی دگەل هەلبژارتیێ لاوێن ئیراقێ ئێك ژ هیڤی و ئارمانجێن سیدادی بوو.
بۆ زانین سیداد حەجی نوری ژ دایكبوویێ 2005ێ ل باژێرێ دهۆكێ یاریزانێ لاوێن یانەیا زاخۆ یە یاریێ د هێلا ناڤین دا دكەت، بەری نوكە یاری بۆ ئەكادیمییا دالكۆرد، یانەیا دهۆك، گارە و نوكە زاخۆ، ل سالا 2022لێ دگەل هەلبژارتیێ لاوێن ئیراقێ شەش یاری كرینە دو دگەل ئیمارات گۆلەك كرییە و دو یاری دگەل هەلبژارتیێ سوریێ بووینە و دگەل هەلبژارتیێ عومانێ ژی بەری دو رۆژان كرییە و شیابوو گۆلەكێ بكەت.
