سیروانی نوو بوو قاره‌مان و زاخۆ لبن گه‌ڤێن داكه‌فتنێ دایه
ئه‌ڤرۆ، قه‌یس وه‌یس
تیما ته‌پا پێی یا یانا سیروانی نوو ناسناڤێ خولا پلا نایابا كوردستانێ مسۆگه‌ركر به‌ری ب دووماهی هاتنا خولێ ب دو گه‌ڕا سه‌رباری وه‌كهه‌ڤییا وێ ل گه‌ل یانا شێروانه ب گۆله‌كێ ژ چارچووڤێ هه‌ڤڕكیێن گه‌ڕا 28ێ ئه‌وا ئێك شه‌مبیا بوری هاتیه كرن، ژلایێ خوه‌ڤه یانا دهۆك مفا ژ ئه‌رد و جه‌ماوه‌رێ خوه نه‌دیت پشتی ل گه‌ل مێڤانا خوه یانا ده‌ربه‌ندیخان وه‌كهه‌ڤبووی ب گۆله‌كێ، هه‌مبه‌ری وێ تیما یانا زاخۆ ئه‌ركێ خوه ب زه‌حمه‌ت ئێخست ژبۆ مانا خوه د خولێ دا پشتی ل یاریگه‌ها خوه تووشی خوساره‌تیێ بووی ل گه‌ل یانا ئارارات ب دو گۆلان به‌رامبه‌ر گۆله‌كێ.
یانا سیروانی نوو سه‌رێ لیستا خولێ دهێت ب كۆمكرنا 51 خالان و ناسناڤێ خولێ مسۆگه‌ر كر پشتی دووركه‌فتی ژ هه‌ڤڕكا خوه هندرین ئه‌وا 42 خال كۆمكرین و رێزا دویێ دهێت، سه‌رباری دو یاریێن ماین به‌ری دووماهی هاتنا خولێ لێ ئه‌و چو كارتیكرنێ ل سه‌ر ناسناڤێ خولێ ناكه‌ت.
یانا دهۆك خودانا 34 خالان رێزا نه‌هێ دهێت چو كارتیكرن ل سه‌ر رێزبه‌ندی و داكه‌فتنا وێ ناكه‌ت، لێ یانا زاخۆ د مه‌ترسیا داكه‌فتنێ دایه ئه‌وا نوكه ب 26 خالان رێزا 14ێ دهێت ب جووداهیا خاله‌كێ ژ هه‌ولێر خودانا رێزا 15ێ، لدووڤ سیسته‌مێ خولێ بتنێ دو یانه دێ پاشڤه‌چنه پلا ئێك، یانا هه‌لۆ ئه‌وا ل ده‌ستپێكا خولێ پشتی بۆرینا چه‌ند یاریان خوه ژ خولێ ڤه‌كێشا بوو كو لدووڤ رێنمایێن ئێكه‌تیا ته‌پا پێی پاشڤه‌چوویه پلا و یانا دویێ د نوكه دا دناڤبه‌را هه‌ردو یانێن زاخۆ و هه‌ولێره.
كوڕێن خابوری پێدڤی ب سه‌ركه‌فتنێ هه‌یه د هه‌ردو یاریێن بهێت دا ژبۆ مسۆگه‌ركرنا مانا خوه، دێ بیته مێڤانا چه‌مچه‌مال و یاریا دووماهیێ دێ هندرین مێڤان كه‌ت، هه‌ولێر دێ هه‌ردو یاریێن خوه ژ ده‌رڤه‌یی یاریگه‌ها خوه ل گه‌ل هندرین و شه‌قلاوه كه‌ت ژبۆ هه‌ڤڕكیا مانا خوه د خولێ دا.
