سیسته‌مێ كه‌سێ ئێكێ !!!
پشتی جڤاكێ نێڤ ده‌وله‌تی چه‌ندین قوناغ برین یێن پری ده‌ره‌به‌گی و شه‌رێن ئاینی و شه‌رێن جیهانی و هه‌وێن داگیركرنێ كو بارا پترا ڤان كاره‌ساتا و شه‌را ب بریارێن تاكه كه‌سی بوون كو جیهان هه‌می به‌ره‌ف ره‌وشه‌كا ئالوز و خراب و پر مه‌ترسی كر! له‌ورا هه‌ر زوی سه‌ركردێن جیهانێ بیر ل جڤاته‌كێ كر و بریارێن گرنگ و گرێدایی ئێمناهیا جیهانێ و كێشێن نێڤ ده‌وله‌تی و ئابوری و چه‌ندین كێشێن دی ئه‌و بو جڤاتا ئێمناهیێ دانا و جڤاتا نه‌ته‌وێن ئێكگرتی و دادگه‌هێن نێڤ ده‌ولی دروستكرن و مه‌ره‌م ئه‌و بو بریارێن گرنگ و پارستنا ژیانا خه‌لكی و ژیارا وان پێكڤه بهێنه دان و رێ لێ بریارێن سته‌مكار و تاك ره‌و بێته گرتن !!
و ڤان پێرابوونا ره‌نگڤه‌دانا خو هه‌بوو ل سه‌ر وه‌لاتێن روژئاڤا و جڤاكێن ژ بریارێن تاكه كه‌سی و مه‌ترسیدار هاتنه پاراستن و هه‌می كار و بریار هاتنه رێكخستن ب یاسا و بریارێن جڤاتی ڤه! به‌لێ مخابن ئه‌ڤان سیسته‌ما و جورێن یاسا ره‌نگڤه دانا خو ل وه‌لاتێن روژهه‌لات و تایبه‌ت ل ده‌ڤه‌را روژهه‌لاتا ناڤین نه‌بوو و ئه‌ڤ ده‌ڤه‌ره هه‌ر مان پاشڤه مایی و كه‌سێ ئێكی ل وه‌لاتی و ل حزبێ و ل دینی و ده‌زگه‌هێن میری و ئه‌منی خودانێن هه‌می ده‌ستهه‌لاتا و بریارا بوون !!
و ئه‌ڤ چه‌نده بو ئه‌گه‌ر كو به‌رده‌وام كوده‌تایێن سه‌ربازی و حزبی ل ڤێ ده‌ڤه‌رێ روی بده‌ن و ژ ئه‌نجامێ ڤێ چه‌ندێ كه‌سێن توندره‌و و حزبێن توندره‌و و عه‌شیرێن توندره‌و و گروپێن بناڤێ ئاینان یێن توندره‌و دروست بوون و تا نوكه ئه‌ڤ وه‌لاته ژ كار و كریار و بریارێن ڤان كه‌س و لایه‌نا قورتال نه‌بوینه و به‌رده‌وام كێشه و شه‌ر د ناڤدا هه‌نه !!
و كوردستان ژی كو وه‌لاته‌كێ پارچه پارچه كری و داگیركری ژ ئه‌گه‌ری تێكه‌لیا وان دگه‌ل چه‌ندین وه‌لاتا و كارتێكرنا ڤی جوره ره‌وشه‌نبیریێ ل سه‌ر وان نوكه ل هه‌ر چوار پارچا ڤی جوره سیسته‌می ره‌نگڤه‌دانا خو هه‌بوویه ل سه‌ر حزب و عه‌شیر و ده‌زگه‌هێن ئه‌منی و ئیداری و كه‌سێ ئێكێ هه‌می تشته و چ بریار نه بێی وی و نه دویری داخازا وی ناهێنه دان!!
هه‌رێما كوردستانێ ژی كو پارچه‌كه ژ ڤێ ده‌ڤه‌را پاشڤه‌مایی ژ زور لایا ڤه تا راده‌كێ مه‌زن ئه‌ڤی جوره سیسته‌می و ره‌وشه‌نبیریێ كارتێكرن لێ كریه و هه‌ر ژ سه‌رده‌مێ شوره‌شا و تا ئه‌ڤرۆ كو سه‌رده‌مێ یاسایی یه و یێ دام و ده‌زگه‌هێن جودا جودایه به‌لێ هه‌ر كه‌سێ ئێكێ خو دانیت سیسته‌م و نابیت نه چ كار و نه چ بریار دویری هزر و بوچونێن وی بهێنه دان و دڤێت هه‌می كار و چالاكی و بریار هشتی وی بن یان د به‌رژه‌وه‌ندیا وی دا بن !! و ڤێ چه‌ندَ وه‌كر كو بێ باوه‌ری و ئێك دوو نه قه‌بیل كرن پتر كویر و به‌لاڤ بیت!! و سیسته‌مێ نوكه ل هه‌رێمێ دهێته په‌یره‌و كرن سیسته‌مێ كه‌سێ ئێكێ یه ل هه‌می دام و ده‌زگه‌ها چ یێن حزبی و چ یێن ئیداری و چ یێن ئه‌منی و سه‌ربازی و كه‌سانێن دی ئان لایه‌نێن دی دبنه پاشكو ئان دیڤه‌لانك بو كه‌سێ ئێكێ !!
و ڤی جوره سیسته‌می ره‌نگڤه‌دانا خو هه‌بوویه ل سه‌ر خه‌لكێ ساده ژی و ل هه‌می جها و بو هه‌ر كاره‌كی ئان داخازیه‌كی دێ قه‌ستا كه‌سێ ئێكێ كه‌ت چونكی باش دزانیت هه‌كه ئه‌و رازیبو هه‌می د رازینه و ئه‌و كار دێ چێ بیت و ئه‌گه‌ر رازی نه‌بو دا ل رێكه‌كێ بگه‌ریێت ڤی كه‌سی رازیكه‌ت دا ئه‌و كار چێبیت و دزانیت كه‌سێن دی ئه‌و ده‌ستهه‌لات نینه بو وی چ كارا بكه‌ن ئه‌گه‌ر كه‌سێ ئێكێ رازی نه‌بیت!!
له‌ورا ئه‌گه‌ر زوی ئه‌ڤ جوره هزر و بیره و ئه‌ڤ سیسته‌مێ كه‌سێ ئێكێ نه‌هێته هه‌لوه‌شاندن و هزر وبیرێن جودا جودا نه هێنه تێكه‌ل كرن و نه‌بنه سیسته‌مه‌كێ هه‌مه لایه‌ن و یێ به‌رفره‌ه و ب یاسا بهێته رێكخستن و جڤاتێن بلند چ یێن حكومی و چ یێن حزبی ب ڤی ره‌نگی نه‌بن و نه‌هێنه خورتكرن و باشتر لێكرن بو خزمه‌تا خه‌لكی هه‌میا و ده‌ستهه‌لات بهێنه دابه‌شكرن و هه‌می ببنه شریكێن بریارێن گرنگ و چاره‌نڤیس و بریارێن د خزمه‌تا خه‌لكی دا، دێ كوردستان به‌رده‌وام د كێشه و قه‌یرانان دا بیت و بتنێ خه‌لك دێ باجا ڤێ چه‌ندێ ده‌ت!!
