سیستەمێ وەرزێ نوو هاتە گوهۆڕین و زاخۆ تاكە یانەیا كوردستانێ یە
ب فەرمی فیدراسیۆنا باسكێت بۆلا ئیراقێ ژڤان و سیستەمێ وەرزێ نوو یێ خولا پلا نایاب راگەهاند كو شێوازێ وێ هاتییە گوهۆڕین ئەوا یانەیا زاخۆ وەكو نوونەرا ئێكانە ل كوردستانێ دێ پشكداریێ تێدا كەت.
د. خالد نەجم بۆ رۆژنامەیا ئەڤرۆ گۆت: دووماهی كۆمبوونا مە دگەل یانەیێن پشكدار بۆ وەرزێ نوو 2023-2024ێ یێ خولێ 13 یانە پشكداربووینە ئەوا تێدا چەند بڕیار و راسپاردە هاتنە راگەهاندن، ژ وانا سیستەمێ وەرزێ بۆری هاتە گوهۆڕین بۆ وەرزێ ئەڤ سالە بڤی شێوەیی، وەرزێ ئەڤ سالە دێ ل ناڤەراستا هەیڤا بهێت دەستپێكەت، شێوازێ خولێ دێ 1-8 هەشت بیت ئانكۆ پشتی ب دووماهی هاتنا قۆناغا خولان تیما رێزا ئێكێ دێ بەرانبەر تیما هەشتێ بیت، چار یانە دێ دەربازبنە قۆناغا چارگۆشەیا زێرین، ئەو تیما خوە ژ خولێ ڤەدكێشیت دێ ئەنجامێن وێ هێنە ژێبرن، هەر تیمەكا رێزێن پێشیێ بهێت دڤێت پشكداری قارەمانیێن دەرڤە بكەت.
ل سەر بابەتێ یاریزانان ژی گۆت: هەر تیمەك ب 17 یاریزان پێكدهێت، سێ یاریزانێن پیشەكار ژوانا دو دناڤ یاریگەهێ دابن، دو یاریزان ل بن 18 سالی دا، ئەو یانەیا یاریزانێن سۆپەر و هەلبژارتیێ ئیراقێ نەبن مافێ هەیی ژ وەلاتێن رۆژئاڤا ئاسیا بینت وەكو یاریزانێ ناڤخۆ ئەوژی ئیران، سوریا، لوبنان، فلەستین، ئوردن و یەمەن، هەروەسان قارەمانیا كۆپا ئیراقێ نابیت یاریزانێ پیشەكار یاریێ بكەت و بڕیار هاتە دان ل نەهێ مەها بهێت پشككێشانا خولا نایاب بهێتە ئەنجامدان.
ل دووڤ زانیاریێن بۆ رۆژنامەیا ئەڤرۆ یانەیا زاخۆ گرێبەست دگەل راهێنەرێ خوە یێ رۆمانی ئیلیان ئۆجین گرێدایە، دیسان ڤەگەڕاندنا یاریزانێ خوە یێ بەرێ ئەحمەد عوبێد ناڤدار عەلۆش و محەمەد حەسەن، دگەل كۆمەكا باش یا یاریزانێن باژێرێ زاخۆ ئەوێن ل وەرزێ بۆری باشترین ئاست نیشان دایی و تیما خوە بەر ب رێزا چارێ یا خولا ئیراقێ بری.
