سینەما كوردی ل رۆژهەلاتێ كوردستانێ د ئاستەكێ باش دایە
زنار تۆڤی:
ئەڤینار مۆلایی، دەرهێنەرەكا كوردە خەلكا باژێرێ ئۆرمییێ یە ل رۆژهەلاتێ كوردستانێ، نوكە قوتابیە ل قوناغا سێیێ ل پشكا سینەمایێ ل زانكۆیا ئیستانبۆلێ، د دیدارەكێ دا بۆ رۆژناما ئەڤرۆ گۆت: ب دیتنا من نوكە سینەما كوردی ل رۆژهەلاتێ كوردستانێ د ئاستەكێ باش دایە و چەندین فلمێن باش یێن سینەمایی ژلایێ دەرهێنەرێن كورد ڤە هاتینە چێكرن، هەروەسا ژنا كورد ل رۆژهەلاتێ كوردستانێ شیایە مل ب ملێ زەلامان كارێن هونەری یێن باش ئەنجام بدەن، هەر چەندە وەكو پێدڤی ژن نەشیایە جهێ خۆ دناڤ سنەمایێ دا بكەن و هژمارا وان گەلەك یا كێمە، لەوما ئەز دخوازم پتر رۆلێ خۆ دناڤ سینەمایێ دا ببینن.
ناڤهاتیێ گۆت: ئەز گەلەكا گەشبینم كو دێ ئاستێ سینەما كوردی بەرب پێشڤە چیت و سینەما كوردی دێ گەهیتە ئاستەكێ بلند، دیسان هەتا نوكە من كورتە فلمێ (كارتا سورایێ) بەرهەمئینایە، كو ژ دەرهێنانا منە، ناڤەرۆكا وی فلمی ل سەر كچەكێ یە ئەو كچ مۆزیكژەنە و بابێ وێ ناهێلیت وی كاری بكەت، بەلێ ئەو كچ مۆزیكێ ناهێلیت، د هەمان دەمدا من ل بەرە هندەك كارێن دی یێن سینەمایی بەرهەم بینم.
