سینەما نەبوویە کلتۆر دناڤ جڤاکێ کوردی دا
ئەڤرۆ، زنار تۆڤی:
ناز سالح ئەکتەر و دەرھێنەرەکا سینەمایی یە، پشکداری د چەندین شانۆگەریان و کارێن سینەمایی دا کرییە، باوەرناما ماستەرێ د بۆارێ دەرھێنانا سینەمایی دا ل بریتانیا وەرگرتییە و چەندین کارێن دەرھێنانێ د بۆارێ سینەمایێ دا ئەنجام داینە، و فلمێ وێ یێ ب ناڤێ (وەن وێی ئەنەزەر) پشکداری د چەندین فلمە فیستەڤالێن جیھانی دا کرییە، د دیدارەکێ دا بۆ رۆژناما ئەڤرۆ گۆت: دەمێ ئەم پرسیارێ ژ ژنا کورد دکەین دناڤ کارێن سسینەمایی دا دڤێت ئەم بەحسێ سینەما کوردی بکەین، ئەرێ سینەما کوردی ژ روویێ چەنداتییێ و چاوانییێ ڤە، شیایە پێگەە و جھێ خوە دیار بکەت، ھەتا بشێت دناڤ وی پێگەھی دا، رۆلێ ژنێ ژی دیار بکەت، د نوکە دا رۆلێ ژنا کورد رۆلەکێ کارا و چالاک نینە ب تایبەتی ژ روویێ ئەزمۆن کرنا کارێ تەکنیکی و دەرھێنانێ ڤە، ھەر چەندە ژ روویێ ئەکتەریێ ڤە، چەندین ژن د بۆارێ سینەمایێ دا کار دکەن، ئەرێ وان رۆلەکێ ئەکتیڤ ھەیە؟ ئەڤە ژی ئاریشەکا دی یە و پێدڤی ب چەندین ڤەکۆلینان ھەیە.
ناڤھاتییێ گۆت: ژ روویەکێ دی ڤە، ھونەر ب گشتی و دناڤ وان دا سینەما نەبوویە کلتۆر دناڤ جڤاکێ کوردی دا، ھەتا نوکە ھێشتا جڤاکێ مە ب چاڤەکێ کێم تەماشەی وان ژنان دکەن، ئەوێن کارێن ھونەری ئەنجام ددەن و خەلک ناھێلن کچێن وان د بۆارێ سینەمایێ دا کار بکەن، ئەڤێ ژی ئاستەنگ دروست کرینە، مە پێدڤی ب شۆرەشەکا ھشیاریێ ھەیە دناڤ تاکێن جڤاکی دا، دڤێت ھونەر ب گشتی ببیتە کلتۆر و ب مخابنی ڤە ھێشتا ل کوردستانێ ب ھیچ رەنگەکی کار بۆ ڤێ چەندێ نەھاتییە کرن، دیسان دڤێت گرنگیەکا مەزن ب سینەمایێ ژی بھێنە دان، چونکو د نوکە ژ گەلەک روویان ڤە یا لاوازە.
