سینەما
د. ئەمجەد عوبەید
دەمژمێر سێی ئێڤاری ژ دەوامێ گەهشتە مال، ب لەز و بەز فراڤین خوار.. ل دویڤ دا چایا خوە ب ئاڤێ سار كر و ڤەخوار، دا بگەهیتە هەڤالێ خوە كو ژڤان دابوویێ ل دەمژمێر سێ و نیڤ بچیتە ب دویڤڕا؛ دا پێكڤە بچن بو تەماشەكرنا فلمان كو دێ ل دەمژمێر چوار ل هۆلا كۆنفراسان ل دهۆكێ هێنە نمایش كرن.
بەری بگەهیتە نك هەڤالێ خوە، ب تێلەفونێ پەیوەندی پێكر.. بەرسڤ نەبوو، چەندین جاران پەیوەندی ب واتساپی.. ب ڤایبەری ب ئینستگرامی.. ب تیلیگرامی.. ب مەسنجەری پێكر.. هەر بەرسڤ نەبوو..!!، بێهنەكێ ل وان كولانان زڤڕی و بەردەوام پەیوەندی پێدكر.. دیسان بەرسڤ نەبوو.. بێهنا وی چك بو و سەد قەسە گۆتنێ و نەزانی چ بكەت. هەر دگۆتە خوە باشە پا ئەڤە ل نك دلێ خوە رەوشەنبیرە و وەسا چ ژ رێزگرتنا ژڤان و دەمی نوزانیت، پا خەلكەكێ سادە چ بكەت…!!
ل دووماهییێ خودێ كەرەم كر، زەنگا موبایلا وی لێدا..
– تو ل كیڤەیی برا؟
– ب توڕەیی ڤە: ئەزێ ل بەر دەرگەهێ جەنابێ تە شتلیم..!!
– پانێ ئەزێ هاتیمە ل سەر جادێ ل ژڤانێ تە.
– تو درەوان دكەیی.
سواری ترۆمبێلێ بوو.. لێبورین ژێ خواست، و داكو هێشتا هێمن ببیت و ژ كەرێ توڕەییێ بێتە خوار، چیڕۆكەكا خو یا كەڤن یا عەشقێ بو ڤەگێرا….
گەهشتنە هۆلا كۆنفرانسان.. هێشتا هندەك دەم مابوو كو فلم دەستپێبكەت.. چونە كافتریایێ دا قەهوەكێ ڤەخون.. ل بەر دەرگەهی بو خوە بیتاقەك یا ب سێ هزاران كری.. هەڤالێ وی ژی باجەك ژ بەریكا خو ئینادەرێ، نیشا كچەكێ ژ وان دا، ئێكسەر بیتاقەك بێ بەرانبەر دایێ.. (لیژنا ئامادەكارا ڤیستەڤالێ باج بو هندەك رەوشەنبیر و گرگرە و هەڤال و پسمام و كور خالەت و كچ مەت و دەزگرێن خوە چێكربوون)، دا پارا نەدەن..
گۆتە هەڤالێ خو هەتا تو قەهوا خوە دكەیێ ئەز دێ چم میزم و پاشی هێم قەهوێ ڤەخوم.. (ئێڤارییان گەلەك میزا وی دهات ب تایبەت ئەگەر پیچەك سەرما با.. وێ ئێڤارێ ژی دونیا پیچەك سەرما بوو).
تا كو زڤڕی .. قەهوە نەما بوو.
چاڤێن خو ل كافتریایێ گێراندن.. دیت هەڤالێ وی یێ د گەل لنگ ڕویتەكێ كەتییە تیقەلیقێ..
چو سلاڤ كرێ.. هەڤالێ وی فەهم نەكر بۆ هەڤالا خوە بدەتە نیاسین.. ئەز دبێژم فەهم دكر، لێ نە دڤیا.. جارەكا دی ناڤچاڤێن وی تێكچوون و مڕێ وی نەخوەش بوو. زانی هەڤالێ وی ئەو ئەرزان فرۆت و حەز دكەت د گەل دۆستا خو تەماشەیی فلمی بكەت.. هەر چەندە هەڤالێ وی هندەك هەولێن شەرمینۆك دان كو ئەو هەست ل نك پەیدا نەبیت، لێ ئەو مالێ خو باش دنیاسیت.. (تشتێ بالا وی كێشایی ل ڤێرێ گەلەك باق و ڕانێن رویس دهاتنە دیتن، و ژبیرنەكەن بەری بێهنەكێ من گۆت بوو دونیا پیچەك سەرما ژی بوو، لێ دا پتر راستگۆ بم؛ وان حورمەتا گورێن تەنك كو ژ رەنگێ ڕانێن خو كربوونێ، چێ دبیت ئەو گەرماتیێ بدەن، مانێ دونیایە و هەمی تشت چێ دبن).
ئەو هێلان و چو دهۆلا سینەمایێ ڤە، ل سەر كورسیكا ئێكێ یا رێزا دووێ یا بەری دویماهییێ روینشت و دگۆتە خو داكو پتر خۆشییێ ژ فلمان ببینی، باشترە ب تنێ سەحكەیێ.. دا دروست بچییە د ناڤ جیهانا چیرۆكێ دا.
بەری فلم دەست پێ بكەت ئێك هات روینشتە ل سەر كورسیكا ل پێشییا وی هەر چەندە گەلەك كورسیك ل پێشییێ د ڤالا بوون، ئەو گەلەكێ درێژ بوو و دیهەكا پرچا قژاڤژ ل سەر سەرێ وی كۆم ببوو.. نیڤەكا شاشێ گرت.. خوە ڤەگوهاستە كورسیكا ئالیێ خوە یێ چەپێ.. هەڤالەكێ خودانێ پرچێ هات.. جهێ خوە دایێ و جارەكا دی چو ل سەر وێ كورسیكا ل بەر سینگێ وی روینشت.. خوە ڤەگوهاستە كورسیكا دی یا ئالیێ خوە یێ چەپێ و هەردو كورسیكێن دەستێ وی یێ راستێ مانە ڤالا..
رۆناهی هاتنە ڤەمراندن و بو زولقتكانێ، گۆتە خوە: ئاها ژبەر ڤێ شولێ هەڤالێ تە تو ب تنێ هێلایی، خودێ دزانیت كا نوكە تلێن وی ل كیرێ د چەرن.. فیلمی دەستپێكر.. هەول دا دگەل فیلمی ب بهۆژیت..
دو گەنج هاتن، كوڕەك و كچەك بوون، روناهییا فلاشێن موبایلێن خو ل وارا د گێڕاندن.. ل جهەكی دگەڕیان.. هاتن ب رەخ ڤە روینشتن، بێهنەكێ بو پستەپستا وان پاش بێدەنگ بوون، ئەو كوڕێ ب رەخ ڤە روینشتی دێ بێژی منەكا خوی یا كرییە قوینێ، هندی دلڤلڤی، ئەو رێزا كورسیكان وەكی جولانكێ لێكر بوو.. زانی كو كابرای دڤێت تشتەكێ بڤە بێژیتە هەڤالا خوە، لێ كولەكا وی هاری ناكەت.. ژبەر هندێ گەلەك یێ پێن خوە دلڤلڤینیت..!!
وی جارەكێ د پەرتووكەكا سایكۆلۆژی دا خواند بوو، كو دەمێ مروڤ د دلەڕاوكێ دا.. گەلەك پێن خوە دلڤینیت.
فلم گەلەك یێ بێ ڕامان و تامسار بوو، نە شییا دگەل بژیت.. میزا وی جارەكا دی هاتەڤە، لێ دڤیا فلمی ب دووماهی بینیت.. میزا وی گەهشتە حەفكا وی.. سەحكرە دەمژمێرێ، دیت كو چل خۆلەكێن بۆرین و هێشتا نێزیكی چل و پێنجان ژی یێن ماین.
بڕیار دا كو فیلمی تەمام نەكەت، و كەلا جگارەكێ ژی لێدا..
هۆل ب جه هێلا و بەرەف دەستشۆیان ڤە چوو.. زڤڕی كافتریایێ دا قەهوەكێ ڤەخوت و ب دویڤ ڕا جگارەكێ ژ دەرڤە ل بەر بایێ سار بكێشیت.. دیسان قەهوە نە دانابوو.. د رێكا خو یا بۆ ژ دەرڤە، دیت كو لنگڕویت یا دۆستا هەڤالێ وی یا دگەل سمبێل بۆقەكی ل كافتریایێ كەتییە تیقەلیقی…!!
7/12/2022
