سیپان سه‌دیق: مانا من ل گه‌ل زاخۆ رێگری ئارمانجا بوو
ئه‌ڤرۆ،عه‌لی حاجی :
د دیداره‌كێ دا یاریزانێ تیما ته‌پا پێی یا یانا زاخۆ دیاركر كو بڕیارا راگه‌هاندنا خوه ڤه‌كێشانێ ژ یانێ ئه‌گه‌رێ كێم ئه‌نجامدانا یاریا ل گه‌ل تیمێ دخولا پلا نایابا ئیراقێ دا و ئه‌ڤچه‌نده ژی رێگر بوو كو ئه‌ز ئارمانجێن خوه ب جهبینم و ب گه‌همه كۆپیتكا ئاست و شیانێن خوه له‌ورا دێ بۆ یانه‌كێ كه‌م بشێت گه‌له‌ك یاریان ل گه‌ل ئه‌نجامبده‌ت.
زێده‌تر سیپان سه‌دیق بۆ رۆژناما ئه‌ڤرۆ گوت: سه‌رباری من چو ئاریشێن دارایی ل گه‌ل زاخۆ نه‌بووینه و شانازیێ ب یانا خوه دبه‌م وه‌كو كوڕه‌كێ ڤی باژێری لێ ئاریشا مه‌زن و یا چو یاریزان نه‌ڤێت تووشبنێ نه پشكداریكرن د یاریێن خولێ دا و بمینت یه‌ده‌ك ئه‌ڤچه‌نده ئه‌و ئاستێ هه‌یی ژی بۆ یاریزانی نامینیت، له‌ورا ل گه‌ل تیمێ یێ ئارام نه‌بووم و دژیه‌كێ بچووك دا هیڤی و ئۆمێدێن خوه دێ ژ ده‌ستده‌م هه‌كه بمینم، پێنگاڤا ئێكێ ئه‌ڤه بوو كو پێخه‌مه‌ت ب گه‌همه ئارمانجێن خوه و رێگری ل من نه‌هێته كرن وه‌كو یاریزانه‌كێ سه‌ره‌كی و شیانێن خوه نیشان بده‌م ئه‌ڤچه‌نده ل زاخۆ رێگری بوو كو ئاستێ خوه یێ راسته‌قینه بۆ جه‌ماوه‌ر و كارگێریێ دیاربكه‌م.
ناڤهاتی ئه‌وچه‌نده ژی دیاركر كو چه‌ند یانێن پشكدار د خولا پلا نایاب و پلا ئێكا ئیراقێ په‌یوه‌ندی ب وی كرینه و گوت: ئه‌ڤ گرێبه‌سته دێ دیڤچوونێ ل سه‌ر كه‌م و بڕیارێن بله‌ز و ئێكلاكه‌ر ناده‌م و دێ وێ یانێ هه‌لبژێرم ئه‌وا لدویڤ ئارمانج و هیڤیێن من و پاشه‌رۆژه‌ك گه‌شتر دابیت.
