سێدارەدانا خەونان
دەیكا دالیایێ
من كتێبا تە
دانا بن بالیفكا خۆ
هەر جارەكا ژتە خەریب دبم
پەیڤێن تە دبنە هەدار
ئەز پێ ئارام دبم و
تەنا دنڤم.
وێ ئێڤارێ من ژڤان بوو
ڤەشارتكانێ دگەل ستێرا بكەین
خەون ڕۆژكێن خۆ
دناف ئەورادا ڤەشێرین
ل هیڤیێ بووم دلێ خۆ یێ وەستیای
دانمە سەر دەستێ خۆ و
پێشكێشی تە بكەم
هەمی ئاخینك و حەسرەتێن خۆ
بدیتنا تە لادەم
لێ ستێر رژیان، ئەور ب شەر چوون
دلێ من بوو پاتەكێ دریای ددەستێ مندا
نە تە دلۆڤانی ب دلێ من بر و
نەژی ڕۆندكێن من
تو هاتی، لێ خۆزی تو نە هاتبای.
دەمێ من
داڤێن پرچا تە یا سپی دیتین
دلێ من هزار ئاواز گۆتن
هەر داڤەك چیرۆكەكە و
هەر چیرۆكەك رۆمانەكا خەمایە
تو بۆ ناهێی ئەز و تو پێگوهۆڕكانا خەما بكەین؟
تو خەمێن خۆ رادەستێ من بكە و
ئەز دێ د میحرابا خەمێن تەدا بجزبەجم
من ژی روحەكا هەی دێ وێ روحێ گۆری تە كەم.
