سێمێل نێزیكی نایاب بوو و تەناهی وەكهەڤی ئینا
تیما یانەیا سێمێل بەردەوامی دا كۆمڤەكرنا خالان و گەشكرنا هیڤیێن دەربازبوونێ بۆ پلا نایابا كوردستانێ یا تەپا پێی، پشتی شیایی سەركەفتنا حەفتێ د خولا پلا ئێك دا بینت، د بەرانبەردا تیما تەناهی وەكهەڤ بوو، د هەڤڕكیێن گەڕا 11ێ ژ چارچووڤەیێ خولێ هاتینە ئەنجامدان.
تیما فوتبۆلا یانەیا سێمێلێ ل سەر هیڤیێن خوە بێ ئۆمێد نەبوویە و بەردەوامی دا كۆمڤەكرنا خالان پشتی د یارییا خوە یا حەفتییا بۆری بەرانبەر مێڤانا خوە یانەیا حەلەبچەیا شەهید ب گۆلەكێ سەركەفتن ئینایی، د یارییا واندا ئەوا ل رۆژا ئەینییا بۆری د ناڤ ئەرد و جەماوەرێ خوە دا كری، گۆلا سێمێلێ ژلایێ حەتەم عەبدولخالق ڤە هاتە تۆماركرن و تیما خوە بەر هیڤیێن مەزنتر بۆ پلێتا دەربازبوونێ ڤەبریە.
ژلایێ خوەڤە تیما یانەیا تەناهی وەكهەڤییا ئێكێ د خولێ دا ئینا پشتی دگەل مێڤانا خوە یانەیا چەمچەمال ب گۆلەكێ وەكهەڤ بوویی، د یاریا واندا ئەوا ل یاریگەها زانكو هاتیە كرن، سەرباری تیما تەناهی تا خولەكێن دووماهیێ یا پێشكەفتی بوو، لێ نەشیا بەرگێرییێ ژ گۆلان خوە بكەن و تیما مێڤانا خالەكا گرنگ ژ خودانێن ئەردی وەرگرت و هیڤیێن وێ د مانا خوە د خولێ دا هێلانە هەلاویستی.
بڤان ئەنجامان تیما یانەیا سێمێلێ ب 22 خالان جهێ خوە ل رێزا چارێ پاراست و تەناهی ب 10 خالان ل رێزا 11ێ دهێت، ئەوا تیما رزگاری ب28 خالان سەرێ لیستێ دهێت، ب 27 خالان پێشەسازی رێزا دویێ و كۆیە ب25 خالان رێزا سێیێ دهێت.
