سێمێل و ئاكرێ د دێربیا ئێكێ یا سالا نوو دا
ئه‌ڤرۆ،زنار زوبێر:
هه‌ردو یانێن پارێزگه‌ها دهۆكێ تیما یانا سێمێل و یانا ئاكرێ دێ یاریا خوه یا ئێكێ د سالا نوو 2022 دا و د دێربیێ ئێكێ یێ پارێزگه‌هێ دا ئه‌نجامده‌ن ده‌مێ ئه‌ڤرۆ ژ چارچووڤێ كۆما ئێكێ و گه‌ڕا نه‌هێ یا خولا پلا ئێكا كوردستانێ ل یاریگه‌ها یانا سێمێل هه‌مبه‌ری ئێك دبن، ژلایێ‌َ خوه‌ڤه دهه‌مان كۆم دا یانا گاره دێ مێڤانداریا یانا پیشه‌سازی كه‌ت و به‌رده‌ره‌ش دێ بیته مێڤانا برۆسك ل هه‌ولێرا پایته‌خت، ئه‌وا دێ یاریێن وان ل ده‌مژمێر دویێ پشتی نیڤرۆ هێنه كرن.
یانا ئاكرێ خودانا سه‌رێ لیستێ ب 14 خالان دهێت بێی خوساره‌تی ژ شه‌ش یاریان چار سه‌ركه‌فتن و دو وه‌كهه‌ڤی، هه‌مبه‌ری وێ یانا سێمێل پێنچ خال كۆمكرینه و رێزا حه‌فتێ دهێت، گاره ب شه‌ش خالان رێزا شه‌شێ دهێت و نوونه‌را چارێ یا پاێزگه‌هێ تیما به‌رده‌ره‌ش پێنچ خالان رێزا هه‌شتێ دهێت.
لدور دووماهی به‌رهه‌ڤیێن وان ئاشتی مسته‌فا راهێنه‌رێ تیما یانا سێمێل بۆ رۆژناما ئه‌ڤرۆ گوت: به‌رهه‌ڤیێن مه گه‌هشتینه ئاسته‌كێ باش و دڤێت هه‌موو بزاڤا بكه‌ین بۆ ب ده‌ستڤه ئینانا سێ خالان، پێنه‌ڤێت یاریه‌كا بهێزه بتنێ سه‌ركه‌ڤتن ئارمانجا مه‌یه چنكو د رێزبه‌ندیه‌كا باش دا نینن و دێ بۆ پێشڤه‌چوونا تیما خوه كه‌ین ژبه‌ركو قۆناغا دویێ ده‌لیڤه‌یا ده‌ربازبوونێ مایه و هه‌ر یاریه‌ك وه‌كو یا دووماهیێ یه بوو مه.
ژلایێ خوه‌ڤه رابین هاشم راهێنه‌رێ یانا گاره بۆ یاریا وان هه‌مبه‌ری پیشه‌سازی گوت: سه‌رباری هه‌بوونا ژماره‌كا یاریزانێن هنگاڤتی كو دبیت كارتیكرنا خوه هه‌بیت لێ ئه‌و یاریزانێن یه‌ده‌ك جهێ باوه‌ریێ نه و شیانێن مه‌زن هه‌نه و دڤێت مفایی ژ ئه‌رد و جه‌ماوه‌رێ خوه وه‌ربگرین و سه‌ركه‌فتنێ تۆماربكه‌ین، تیما پێشه‌سازی رێزا سێیێ دهێت ئانكو تیمه‌كا بهێزه له‌ورا یاری ژی ب سانه‌هی نابیت.
هۆزڤان زاهد سه‌رپه‌رشتێ تیما ئاكرێ یاریا تیما خوه ل گه‌ل سێمێلێ ب ئێك ژ هێزترین یاریێن وان یێن خولێ دا دیاركرن و گۆت: سه‌ركه‌فتنا ڤێ یاریێ دێ پێگاڤه‌كا باش بیت بۆ پاراستنا سه‌رێ لیستێ و هیڤیێن مه مه‌زنتر لێكه‌ت و بهێزترین یاریێن مه یێن خولێ نه، چار یاریزانێن مه دێ بیێ به‌هربن ژ پشكداریێ ئه‌وژی ژبه‌ر هه‌بوونا هنگاڤتن و كارتێن زه‌ر، لێ هیڤییا مه ئه‌وه یاریه‌كا پری خوش بیت و هه‌ردو تیم ناڤێ پارێزگه‌هێ ب ئاست ڕاكه‌ن.
