سێمێل و زاخۆ دێ مێڤاندارییا دو قارەمانیێن نێڤدەولەتی كەن
شاهۆ فەرید:
د داخویانیەكا تایبەت دا عەلی حسێن سەرۆكێ فێدراسیونا لەش جوانیێ بۆ رۆژنامەیا ئەڤرۆ دیار كر پشتی ڕازەمەندییا فەرمی وەرگرتی ئەو یێ بەرهەڤیان دكەین بۆ مێڤاندارییا دو قارەمانیێن نێڤدەولەتی دكەن.
هەروەسان ناڤهاتی گۆت: ل دووڤ خشتەیێ هاتییە دانان یا ئێكێ د ناڤبەرا سێ بۆ چارێ هەیڤا چریا ئێكێ یا بهێت باژێرێ سێمێلێ مێهڤانداریا قارەمانیا ئێم پی سی كەین كۆ ئێكە ژ قارەمانیێن هەرە مەزن لسەر ئاستێ جیهانێ، تێدا چەندین یاریزان لسەر ئاستێن جودا دێ پشكداریێ كەن، دێ یاریزانێن دەرڤە و ناڤخوەیی هەڤركیێ لسەر پلێتێن ئەڤێ قارەمانیێ كەن ئەڤێ قارەمانیێ دێ هەڤڕكیەكا زۆر هەبیت بۆ دەستڤەئینانا پلێتێن پێشەكاریێ.
هەروەسان عەلی حسێن گۆت: لدووڤ دا و پشتی بۆرینا پێنچ رۆژان دێ باژێرێ زاخۆ مێڤاندارییا قارەمانیا هەلبژارتیێن دەڤەریێن كوردستانێ كەت، ئەڤ قارەمانیە ژلایێ فێدراسیونا لەشجوانیا ئیراقێ هەڤكاری دگەل فدراسیۆنا هەمان یاری ل دهۆك ل هۆلا كوچكا هونەری هێتە ڕێكخستن، هەر دەڤەرەك دێ هەلبژارتیێ خوە پشكدار بیت وەكۆ هەلەبچە، سۆران، هەولێر، دهۆك و سلێمانی، قارەمانی بتنێ بۆ هەرێما كوردستانێ یە پێنچ هەلبژارتی پشكدارن دەهی چریا ئێكێ بۆ هاتیە دەستنیشانكرن بۆ قارەمانیێ.
ژلایەكێ دووڤە ناڤهاتی هیڤی خواست ئەو بشێن جوانترین شێوە قارەمانییا ڕێكبێخن و داخواز ژ هەموو یاریزانێن پشكدار كر ئەڤێ دەلیڤێ ژ دەست نەدەن و مفایی ژێ وەربگرن و بشێن دەستكەڤێت ژ هەژی بۆ باژێرێ خوە و كوردستانێ بینن.
بۆ زانین ل پارێزگەها دهۆكێ كۆمەكا باش یا هۆلێن وەرزش یێن لەشجوانیێ هەنە و شیاینە یاریزانێن خودان شیان پەیدابكەن و چەندین پشكداریێن دەرڤە كرینە و ناسناڤێن باش ب دەستڤە ئیناینە، ئەڤ قارەمانییە دبیتە درێژەپێدانا پێشكەڤتنا وەرزشێ ل كوردستانێ و پارێزگەها دهۆكێ.
