سێمێل و گاره دێ یانێن هه‌ولێرێ مێڤان كه‌ن
ئه‌ڤرۆ،
دهێته چاڤه‌ڕێ كرن ئه‌ڤرۆ هه‌ردو یانێن پارێزگه‌ها دهۆكێ سێمێل و گاره مێڤانداریا هه‌ردو یانێن هه‌ولێرا پایته‌خت برۆسك و خاك بكه‌ن ژ چارچووڤێ هه‌ڤڕكیێن گه‌ڕا پێنجێ و كۆما ئێكێ بۆ یانێن پلا ئێكا كوردستانێ یا ته‌پا پێی.
ل یاریگه‌ها یانا دهۆك یا سێیێ تیما یانا سێمێلێ دێ مێڤانداریا یانا برۆسك یا هه‌ولێری كه‌ت، نوونه‌را پارێزگه‌هێ ژ سێ یاریان بتنێ دو خال هه‌نه و رێزا شه‌شێ دهێت كو ئه‌ڤ رێزبه‌ندیه نه هیڤیێن كوڕێن سێمێلێ نه و دێ بزاڤێ كه‌ن پشتبه‌ستن ب جه‌ماوه‌رێ خوه سه‌ركه‌فتنا ئێكێ تۆماربكه‌ن و ده‌ست ب ئارمانجێن خوه بكه‌ن ژبۆ هه‌ڤڕكیێ بۆ رێزێن ئێكێ و ده‌ربازبوونێ.
د داخویانیه‌كێدا په‌روه‌ر حسێن سه‌رپه‌رشتێ تیما سێمێلێ بۆ رۆژناما ئه‌ڤرۆ دیاركر كو ئه‌و به‌رهه‌ڤن و رژدن سێ خالان ب ده‌ستڤه بینین و گۆت: ژ یاریا ئه‌ڤرۆ و تا دووماهییا خولێ نابیت چو خالان ژ ده‌ست به‌دین پێخه‌مه‌ت هیڤیێن مه لاواز نه‌بن بۆ ده‌ربازبوونێ، هه‌موو یاریزان به‌رهه‌ڤن و مه جه‌ماوه‌ره‌كێ دلسۆز هه‌یه و كلیلكا سه‌ركه‌فتنێ یه ب هیڤییا وێ یه‌كێ یاریا ئه‌ڤرۆ ده‌ستپێكا سه‌ركه‌فتنان بیت.
ژلایه‌كێ دووڤه نوونه‌را دویێ یا پارێزگه‌هێ یانا گاره دێ ل یاریگه‌ها خوه مێڤانداریا یانا خاك كه‌ت، گاره ب چار خالان رێزا چارێ دهێت و مێڤانا وێ بتنێ دو خال هه‌نه و رێزا حه‌فتێ یه، یاریا ئه‌ڤرۆ ده‌لیڤه‌یه بۆ تیما پارێزگه‌هێ دناڤ ئه‌رد و جه‌ماوه‌رێ خوه دا به‌رده‌وامیێ بده‌ته پێشڤه‌چوونا خوه د رێزبه‌ندیێ دا، هه‌مبه‌ری وێ یانا خاك دێ بزاڤێ كه‌ت خوه ژ رێزێن دووماهیێ و داكه‌فتنێ پارێزیت.
ژلایێ خوه‌ڤه وه‌لات عه‌بدولخالق هاریكارێ راهێنه‌رێ گاره دیاركر كو یاریا وان یا ئه‌ڤرۆ گه‌له‌كا گرنگه و دڤێت مفایی ژ ئه‌رد و جه‌ماوه‌رێ خوه وه‌ربگرین و هه‌موو یاریزان بۆ ئێك ئارمانج هاتینه راسپاردن ئه‌وژی د 90 خوله‌كان دا بیێ راوه‌ستیان هه‌تا گۆلان تۆماربكه‌ن و سه‌ركه‌فتنێ بینن، یاری ب سانه‌هی نابیت لێ ئه‌م داخازكرینه بۆ قه‌ره‌بوویا یاریا بوری.
ژلایێ خوه‌ڤه یانا به‌رده‌ره‌ش نوونه‌را سێیێ یا پارێزگه‌هێ دێ بیته مێڤانا یانا پێشه‌سازی، به‌رده‌ره‌ش د رێزبه‌ندیه‌كا خراب دایه ب خاله‌كێ و رێزا دووماهیێ دهێت، هه‌مبه‌ری وێ پێشه‌سازی ب سێ خالان رێزا پێنجێ دهێت، د ڤێ گه‌ڕێ دا نوونه‌را چارێ یا پارێزگه‌ها دهۆكێ تیمایانا ئاكرێ ئه‌وا ب حه‌فت خالان رێزا دویێ دهێت یا چاڤه‌ڕێ بیت.
