سێمێل ڤه‌گه‌ڕیا چالاكییان و كادرێ راهێنانێ ده‌ست نیشان كر
ئه‌ڤرۆ،
كارگێریا یانا سێمێل یا وه‌رزشی ڤه‌گه‌ڕیا چالاكیێن وه‌رزشی پشتی سۆزا پشته‌ڤانیێ بۆ هاتیه دان ب فه‌رمی كادرێ تیما خوه یا ته‌پا پێی بۆ وه‌رزێ نوو یێ خولا پلا ئێكا كوردستانێ ده‌ست نیشانكر ئه‌وا دهێته چاڤه‌ڕێ كرن هه‌ڤركیێن خولێ ل 14ی چڕیا دویێ یا بهێت ب پشكداریا 18 یانێن هه‌رێمێ ب هێته ئه‌نجامدان.
ل دۆر ڤێ پێنگاڤێ په‌روه‌ر حسێن جێگرێ سه‌رۆك یانا سێمێلێ بۆ رۆژناما ئه‌ڤرۆ گۆت: ب فه‌رمی كادرێ راهێنانێ هاته ده‌ستنیشانكرن كو هه‌موو كورێن باژێرێ سێمێلێ نه ئه‌وژی محه‌مه‌د یوسف وه‌كو راهێنه‌ر و غه‌ریب حه‌سه‌ن هاریكارێ وی و فوئاد عه‌بد راهێنه‌رێ گۆلپارێزان ژ مووسلێ و به‌هدین نائیف ئه‌ندامێ كارگێرێ دێ سه‌رپه‌رشتیا تیمێ كه‌ت ژبۆ ده‌ست به‌رهه‌ڤیان بۆ وه‌رزێ نوو یێ خولا كوردستانێ و ئه‌ڤرۆ دبیت خرڤه‌بوونا ئێكێ یا چه‌ند یاریزانێن ل یاریگه‌هێ بهێته كرن، ژبه‌ركو ده‌م یێ كورته دێ بزاڤێ كه‌ین ب شێوه‌كێ ب له‌ز چه‌ند یاریزانێن به‌ری نوكه و خودان سه‌ربۆر ل گه‌ل یانێ دۆباره ڤه‌گه‌ڕێنه دناڤ رێزێن تیمێ دا ل گه‌ل كۆمه‌كا باش یا یاریزانێن تیما لاوان كو دێ مفایی ژێ وه‌رگرین.
هه‌روه‌سان ناڤهاتی دیاركر ڤه‌گه‌ڕاندنا چالاكیێن وه‌رزشی هات پشتی ژلایێ حوكمه‌تا هه‌رێما كوردستانێ و رێڤه‌به‌ریا گشتی یا وه‌رزشی سۆزا پشته‌ڤانیێ بۆ مه هاتیه دان و گۆت: به‌رهه‌ڤ و پشكداریا مه دێ ل دووڤ ئه‌وێ پشته‌ڤانیێ بیت و یا دشیان دا بیت ب كوڕێن باژێرێ خوه و یێن پارێزگه‌هێ ب باشترین شێوه به‌رهه‌ڤیان بكه‌ین.
بۆ زانین محه‌مه‌د یوسف به‌ری نوكه راهێنه‌رێ یانێن دهۆك، زاخۆ و سێمێل بوویه ل هه‌ردو خولێن نایابا ئیراقێ و كوردستانێ دا و شیابوو دو جاران یانا سێمێلێ بگه‌هینته پلا نایابا كوردستانێ.
