سێ تیمێن پارێزگەهێ دێ پشكداریێ د قارەمانییا ئیراقێ دا كەن
شاهۆ فەرید:
چاڤەڕێ دهێتە كرن ل 25ێ ڤێ مەهێ قارەمانییا ئیراقێ بۆ تەپا بلەز ل باژێرێ مووسلێ بهێتە كرن و سێ تیمێن پارێزگەهێ پشكدارن ئەو ژی تیما یانەیا پیرس و یانەیا پۆلیتەكنیك و تیما بنگەهێ وەرزش و لاوێن پارێزگەها دهۆكێ ئەوا بڕیارە بۆ ماوەیێ سێ رۆژان ب پشكدارییا 36 یانە و دەزگەهێن وەرزشی هێتە كرن.
لدۆر ڤێ یەكێ سەعید حەجی تاهر سەرۆكێ فێدراسیونا تەپا بلەز ل دهۆكێ بۆ رۆژنامەیا ئەڤرۆ دیاركر: بڕیارە پیرس، پۆلیتەكنیك و بنگەهێ وەرزش ولاوێن دهۆكێ پشكداری قارەمانییا ئیراقێ بن بەرهەڤیێن وان گەهشتینە ئاستەكێ بش ئەوا بڕیارە پێنج شەمبییا بهێت ل مووسلێ بهێتە كرن، ب هیڤی نە دێ ئەنجامێن باش هەبن، مە یاریزانێن خودان شیان ل سەر ئاست و كوڕان و كچان یێن هەین.
هەروەسان ناڤهاتی گۆت: ئەڤ یارییە یا نوویە ل سالا 2004 وەكو دهۆكێ ئێكەم پارێزگەها كوردستانێ یە دامەزراندنی، یارییا خۆش و تایبەتە یاریزانان حەز ژێ دكەن، بتنێ پێدڤی ب پشتەڤانیێ نە، ئەڤ قارەمانییە بۆ یاریزانێن مە گەلە یا گرنگە و پێنگاڤەكە بۆ پشكداریێ د قارەمانیێن دەرڤە دا، داخوازیێ ژ جهێن پەیوەندیدار دكەین هاریكاربن دگەل مە دا بۆ ئەڤێ یاریێ دا بشێن ئەنجام و ئاستێن هەرە باش دەستڤەبینین.
بۆ زانین پار سال ئەڤ قارەمانییە بۆ جارا ئێكێ هاتبوو ڕێكخستن، یانەیا پۆلیتەكنیك شیان رێزا دویێ بینت و ناڤەندا وەرزش و لاوان رێزبەندییا سێیێ دەستڤەبنیت، چاڤەرێ دهێتە كرن ئەڤێ قارەمانیێ تێمین دهۆكێ هەڤركیێن دژواربكەن بۆ دەستڤەئیننا رێزبەندیێن پێشیێ.
