سێ قارەمانیێن ئیراقێ د ناڤا باژێڕێ دهۆكێ دا دهێنە كرن
شاهۆ فەرید:
چاڤەرێ دهێتە كرن ئەڤرۆ و سوبەهی سێ قارەمانیێن وەرزشێن جودا یێن ل سەر ئاستێ ئیراقێ ل باژێرێ دهۆكێ بهێنە كرن، ژلایەكێ دووڤە قارەمانییا ئیراقێ بۆ فوتبۆلا شەش یاریزانی بەردەوامە، ئەو قارەمانیێن دهێنە كرن بڤی ڕەنگی نە.
1- قارەمانییا تێنسا ل سەر مێزێ
بڕیارە ئەڤرۆ ل هۆلا گرتییا یانەیا دهۆكێ دەست ب هەڤڕكیێن قارەمانییا ئیراقێ یا تێنسا ل سەر مێزێ بۆ كۆما چارێ یا قووناغا ئێكێ ب پشكدارییا هەشت یانەیێن هەرێمێ بهێتە كرن، ئەوژی هەر ئێك ژ یانەیێن، پۆلیتەكنیك، هەولێر، برایەتی، ئەكاد، ئاسۆ، رەواندۆز، فتوە، ئارارات، ئەوا یاریێن وان بشێوەیێ خول دهێنە كرن.
2- قارەمانییا تێنسا ئەردی
بڕیارە سوبەهی ل یاریگەهێن یانەیا دهۆك دەست ب هەڤڕكیێن قارەمانییا ئیراقێ یا تێنسا ئەردی ل سەر ئاستێ كچان بۆ ژیێن 16 سالی بهێتە كرن، ئەوا دهێتە پێشبینیكرن 10 یانەیێن ئیراقی پشكداربن ژ وانا هەردو یانەیێن دهۆك و سەنحاریب هەڤڕكیێ بۆ رێزێن پێشیێ بكەن.
3- قارەمانییا فوتبۆلێ
هەر دچارچووڤەیێ قارەمانیێن ئیراقێ دا ئەڤرۆ دێ سێ یاریێن دی ژ قارەمانییا فوتبۆلا ئیراقێ یا شەش یاریزانی بۆ یانەیان ل سەر ئاستێ كچان ل یاریگەها سیروان یا بچووكری دێ هێتە كرن بڤی شێوەیی، سۆران- ئالبدێر، تلسقۆف- قەرەقووش، (بنت العراق)- رۆژهەلات، بۆ زانین سۆبەهی یانەیا ئافرەتێن دهۆك دێ یارییا خوە بەرانبەر سەركەڤتنیێ(بنت العراق) و رۆژهەلات كەت.
بۆ زانین هەر سال پارێزگەها دهۆكێ مێڤاندارییا كۆمەكا قارەمانیێن ئیراقێ دكەت ئەڤچەندە ژی ژبەر وێ یەكێ یە خالێن سەركەڤتنێ هەنە ژ وانا ژێرخانەیا وەرزشی، سەقایێ دلخوەشكەر بۆ تیمێن مێڤان و ئارامییا دناڤا باژێری دا و حەزا بەردەوام یا فدراسیۆن و یانەیێن وەرزشی ژبۆ پشكداریێ د قارەمانیێ دا بكەن.
