سێ كچێن دهۆكێ بۆ كۆپا رۆژئاڤا یا ئاسیا هاتنە داخوازكرن
د داخویانییەكێ دا سكرتێرێ یانەیا ئافرەتێن دهۆك خویاكر سێ یاریزانێن وان د نوكە دا دگەل هەلبژارتیێ ئیراقێ نە دناڤا كەمپێ ڕاهێنانێ دا خوە بەرهەڤكرن بۆ كۆپا رۆژئاڤا ئاسیا یا فوتبۆلێ ئەوا بڕیارە هەڤڕكیێن وێ ل ناڤەڕاستا چریا دویێ یا بهێت وەلاتێ سعۆدیێ مێڤاندارییا وێ بكەت.
زێدەتر سلێمان زەكی بۆ رۆژنامەیا ئەڤرۆ گۆت: پشتی لیستەیا دووماهیێ یا پێكهاتیێ هەلبژارتیێ ئیراقێ ل سەر ئاستێ كچان هاتییە ڕاگەهاندن هەر ئێك ژ سیپەل شوكر، مەروا جیان و دلپاك جبۆر ل پایتەختێ ئیراقێ بەغدا د ناڤا كەمپێ ڕاهێنانێ دا بوون خوە بەرهەڤكرن بۆ كۆپا رۆژئاڤا ئاسیا یا فوتبۆلێ، ئەوا بڕیار ل 14ێ چریا دویێ یا بهێت وەلاتێ سعۆدیێ مێڤانداریێ بكەت و دهێتە پێشبینیكرن هەتا هەشت هەلبژارتیێن رۆژئاڤا ئاسیا پشكداربن.
هەروەسان ناڤهاتی گۆت: هەرسێ یاریزان ب شیانێن خوە یێن كەسۆكی وەكو ئاستێ هونەری و تەكتیكی شیان جهێن خوە دناڤ ڕێزێن هەلبژارتیێ ئیراقێ وەربگرن و گەشبینم دێ باشترین ئاست نیشان دەن، هەروەسان مە پێنچ یاریزانێن دی هەنە ل سەر ئاستێ تازەپێگەهشتییان دناڤ ڕێزێن هەلبژارتیێ ئیراقێ دانە ئەڤە ژی دیاركەت كو كادرێ ڕاهێنانێ و كارگێرییا یانەیێ كارەكێ دورست دكەت و دیسان بەلگەیە كو كچێن یاریزان ل پارێزگەها دهۆكێ خودان شیانن.
