سێ ڤه‌دیتن بو چێكرنا په‌یكه‌رێ ته‌حسین تاهای هاتینه چێكرن و هه‌ر وه‌ك خوه‌یه
ئامێدیێ ، مه‌حمود نهێلی
په‌یكه‌رێ ته‌حسین تاها ل سیلاڤێ ئێكبوویه ژ هێمایێن باژێرێ ئامێدیێ، لێ نها یێ ژ ناڤ دچیت و خراب دبیت، ئه‌ڤ یه‌كه ژی بوویه ئه‌گه‌رێ دلگرانیا ره‌وشه‌نبیر و هونه‌رمه‌ند و هونه‌ردوست و حه‌ژێكه‌رێن ڤی هونه‌رمه‌ندێ مه‌زن و ژ به‌ر كێمكرنا گله و گازندێن وه‌لاتیان رێڤه‌به‌ریا ره‌وشه‌نبری و هونه‌ری ل ئامێدیێ رابوویه ب نخافتنا ڤی په‌یكه‌ری ل بن په‌رده‌یه‌كی ڤه و دبێژن چه‌ندین جاران مه ڤه‌دیتن بۆ ئه‌نجامداینه و مه داخاز كریه بهێته نووژه‌نكرن، لێ هه‌تا نوكه چو به‌رسڤ نه‌بووینه.
كاوه ئامێدی، به‌رپرسێ رێكخراوا وه‌رار یا ڤه‌كولین و گه‌شه‌پێدانان ل ئامێدیێ بۆ رۆژناما ئه‌ڤرۆ دیاركر، بابه‌تێ په‌یكه‌رێ ته‌حسین تاها ل ئامێدیێ یێ بوویه جهێ گازنده و ره‌خنێن هه‌ژماره‌كا زۆرا خه‌لكێ ده‌ڤه‌رێ، ژ به‌ر كو نه وێنێ وی و نه ره‌نگی وی ده‌ت، نه‌ژی جهێ په‌یكه‌ر لێ هاتیه دانانا یێ گونجایه بۆ ڤێ مه‌به‌ستێ و گۆت: ژ به‌ر وێ یه‌كێ ژی ئه‌ڤ په‌یكه‌ره یێ هاتیه پشتگوه خستن و به‌ره‌ڤ ژناڤچوونێ ژی دچیت.
و گۆت: ب دیتنا من هونه‌رمه‌ند ته‌حسین تاها هونه‌رمه‌نده‌كه نه مولكێ ئامێدیێ ب تنێ یه، به‌لكی هونه‌رمه‌نده‌كه یێن هه‌ر چار پارچێن كوردستانێ یه و قوتابخانه‌یه‌كا هونه‌ری بوویه بۆ پێشخستنا سترانا هه‌ڤچه‌رخا كوردی.
نایف چه‌لكی، رێڤه‌به‌رێ ره‌وشه‌نبیری و هونه‌ری ل ئامێدیێ بۆ رۆژناما ئه‌ڤرۆ دیاركر، وان ئاگه‌ه ژ بابه‌تی هه‌یه و دووڤچونه‌كا تمام یا بابه‌تی كریه و گۆت: (پشتی مه ل سالا چوویی سه‌را په‌یكه‌ری دای بو وێ یه‌كێ لێكولینێ ل سه‌ر بكه‌ین و بزانین چاره‌سه‌ری چیه و بۆ مه دیار بوویه ئه‌و جهێ نوكه په‌یكه‌ر لێ هاتیه دانان نه جهه‌كێ گونجایی ژ به‌ر وێ یه‌كێ به‌رده‌وام دهێته خراب كرن و تێكدان، ئه‌ڤجا وان ب فه‌ردیت په‌رده‌كێ ل سه‌ر ڤی په‌یكه‌ری دانن تا دهێته نووژه‌نكرن).
ناڤهاتی ته‌كه‌ست ژی كر، وان سێ جاران ڤه‌دیتن بۆ ڤی په‌یكه‌ری دروستكرینه و داینه جهێن په‌یوه‌ندیدار بۆ وێ یه‌كێ ئه‌ڤ په‌یكه‌ره بهێته نووژه‌نكرن، یان ژی ل جهه‌كێ دی یێ گونجایتر بهێته دیتن و په‌یكه‌ره‌كی دی بو بهێته دروستكرن .
رێڤه‌به‌رێ ره‌وشه‌نبیری و هونه‌ری ل ئامێدیێ ئاشكرا كر، ل دووڤ وان ڤه‌دیتنێن وان ئه‌نجام داین، ڤێ جارێ دێ ب ره‌نگه‌كی باشتر و ل جهه‌كی باشتر ئه‌ڤ په‌یكه‌ره هێـته دانان، چونكو هندی بۆ ڤی هونه‌رمه‌ندێ مه‌زن بهێته ئه‌نجامدان به‌رامبه‌ری خزمه‌تا وی بۆ هونه‌رێ كوردی كری هه‌ر یا كێمه.
