سێ گۆتگۆتك و خه‌یال ل دۆر مۆبایلێن ئه‌ندرۆید و خه‌لك ژی باوه‌ر دكه‌ن
ئه‌ڤرۆ:
وه‌كو هه‌ر سیسته‌مه‌كێ دی یێ كاركرنێ، گه‌له‌ك گۆتگۆتك ل سه‌ر سیسته‌مێ ئه‌ندرۆید ژی هاتینه گۆتن و ل گه‌ل بۆرینا ده‌می هه‌موو راستی ئاشكه‌را دبن، هنده‌ك ژ وان د درستن و هنده‌ك ژی د دوورن ژ راستیێ.
ئه‌ڤرۆ دێ سێ تشتان بۆ ته‌ر به‌رچاڤ كه‌ین كو هاتینه گۆتن و د راستی دا وه‌سا نینن و دڤێت باوه‌ریا خوه پێ نه‌ئینی.
– مۆبایلێ ب تنێ ب وه‌یرا ئورجینال بارگه بكه:
نه‌خێر، وه‌سا نینه. مۆبایل هند یێن پێش كه‌فتی كو وێ چه‌ندێ قه‌بوول بكه‌ن ب وائیره‌كا دی بهێنه بارگه كرن و نه‌یا وێ یا ئورجینال بیت و ئه‌ڤ كه‌ره‌سته ژی ئێدی یێن پێش كه‌فتین و خوه ل سه‌ر مۆبایلان د گۆنجینن، بێ به‌رێ خوه بده‌یێ كا چ مۆبایلێ ب كار دئینی، چو كارتێكرنا خوه نابیت هه‌كه چ جورێ وایرێ بۆ بارگه‌كرنێ بكارئینی، هه‌ر پاتری ب بورینا ده‌می دێ ل كێمیێ ده‌ت و ژ ناڤ چیت.
هه‌كه ئه‌و كه‌رستێن بۆ بارگه‌كرنێ ب كار دئینی چه‌ند د بێ كوالێتی بن و چه‌ند ژ برانده‌كا باش یان خراب بن. مۆبایل نها ب دو رێكخه‌ران وزێ دده‌ن ئه‌وێن كو ئه‌و پێدڤی پێ، ژ به‌ر هندێ ژی ژ جورێ وایرێ بۆ بارگه‌كرنێ نه‌ترسه.
براندێن جیهانی ژی هند ب سه‌روبه‌ر نینن كو جوداهیه‌كا مه‌زن بێخنێ، ژ به‌ر هندێ ژی دبێژین وایرا بارگه‌كرنێ چو مه‌ترسیێن خراب ل سه‌ر مۆبایلێ نینن. ئێدێ گوهداریا وێ گۆتنێ نه‌كه یا دبێژیت دڤێت ئامیرێ بارگه‌كرنا مۆبایلا فلان براند بیت.
– ئابده‌یتكرن مۆبایلێ خرابتر لێ دكه‌ت:
گه‌له‌ك یا به‌ربه‌لاڤه و ب زۆری ژی دهێته گۆتن ده‌ما ئێكێ یان ئێكێ بڤێت مۆبایلا خوه ئابده‌یت كه‌ت، هند یا به‌ربه‌لاڤه ژی كو دبیت كه‌س ژ مه نه‌مابیت گوه ل ڤێ گۆتنێ نه‌بووی كو هه‌كه تله‌فۆنا خوه ئابده‌یت كه‌یی، دێ خرابتر لێ هێت. راسته كو هنده‌ك جاران ئابده‌یتان هنده‌ك كێماسی تێدا هه‌نه، به‌لێ دڤێت هند گرنگیێ پێ نه‌دین و گرنگ وه‌رنه‌گرین، چونكو نه د سه‌ره‌كی نه و زوو دهێنه چاره‌كرن.
هه‌كه كۆمپانیێ ئابده‌یته‌ك ده‌رێخست، ئه‌و رامانا وێ ئه‌وه كو دێ ئێك ژ ئاریشێن ئه‌و ئامیرێ ته هه‌یی چاره كه‌ت، گه‌له‌ك چاره‌سه‌ركاری بۆ رێیێن پاراستنا مۆبایلێ ژی دهێنه زێده‌كرن و كودێن نهێنی ژی دهێنه پاراستن. مۆبایلا ئابده‌یتكری پتر دێ تایبه‌تمه‌ندیێن ته پارێزیت و گه‌له‌ك خزمه‌تێن نوو ژی دێ زێده بن.
هنده‌ك گوهۆڕین د شێواز و كاری دا دهێنه كرن، دبیت ل ده‌ستپێكێ ئه‌ڤه یا ب دلێ ته نه‌بیت، به‌لێ تشته‌كه دێ هه‌ر هێته كرن و ئه‌ڤرۆ روو نه‌ده‌ت دێ سوبه‌هی روو ده‌ت.
ده‌مێ هه‌ر ئابده‌یته‌ك دهێت، هنده‌ك كه‌سان دلخۆش دكه‌ت و هنده‌ك ژی خه‌مناك دبن، ئابده‌یتكرنا مۆبایلێ تشته‌كێ گرنگه و دڤێت به‌رده‌وام بهێته كرن ل هه‌ر ده‌مه‌كێ داخوازێ ژ ته دكه‌ت.
– شیرت ل ته هاتیه كرن كو پاتری ڤالا ببیت، ژ نوو مۆبایلێ بارگه بكه‌یی:
نه، نه، نه، ئێكجار پێدڤی ب وێ چه‌ندێ ناكه‌ت پاتریا مۆبایلێن زیره‌ك ڤالا ببیت ژ نوو پڕ بكه‌یی، د سه‌ر ڤێ چه‌ندێ را زیانێن خوه پتر هه‌نه ژ باشیێن خوه.
خانێن پاتریێ تووشی كاركرنه‌كا زێده دبن ل ده‌مێ پاتری به‌ر ب دووماهیێ ڤه دچیت، ژ به‌ر هندێ نه‌یا باشه هه‌ر ده‌م خوه بگری هه‌تا پاتری گه‌له‌ك كێم ببیت ژ نوو پڕ بكه‌یی. نابیت چو جاران ببیه ئه‌گه‌ر كو مۆبایلا ته ژ بێ پاتری ب ڤه‌مریت، ب تنێ هه‌كه چو چاره نه‌بن و كه‌رستێن بارگه‌كرنێ ل گه‌ل ته نه‌بن.
ب درێژاهیا ده‌می دێ شاشا مۆبایلا ته یا تاری بیت و پێدڤی ب كاره‌كێ زۆر بیت بۆ دابینكرنا بارگێ و ب ڤێ چه‌ندێ ژی دێ زیانه‌كا مه‌زن پێ كه‌ڤیت. ژ به‌ر هندێ نه‌هێله بارگا مۆبایلا ته ژ 10 بۆ 15% كێمتر لێ بهێت و جاره‌كا دی بارگه بكه‌ڤه.
ئه‌ڤه سێ تشتێن نه‌راست بوون كو گه‌له‌ك ب به‌ربه‌لاڤی هاتبوونه به‌لاڤكرن و پتریا بكارئینه‌رێن ڤان ئامیران ژی باوه‌ری پێ هه‌یه، به‌لێ هیڤی یه پشتی خواندنا ڤی بابه‌تی باوه‌ر ژێ نه‌كه‌ن.
