سێ گۆڕێن ب كۆم ل شنگالێ هاتینه تێكدان
دهۆك، له‌زگین جوقی:
قایمقامێ قه‌زا شنگالێ دیار كر كو سێ گۆڕێن ب كۆم ل شنگالێ هاتینه تێكدان و چه‌ند رژۆێن كێم ماینه حه‌فت سال د سه‌ر جینۆسایدا شنگالێ ڕا دێ بۆرن و هێشتا هه‌ستیێن د ناڤ گۆرێن ب كۆم دا نه‌هاتینه راكرن و بن ئاخكرن.
مه‌حما خه‌لیل، قایمقامێ قه‌زا شنگالێ بۆ رۆژناما ئه‌ڤرۆ خویا كر، ئه‌ڤه حه‌فت سالن پتریا گۆرێن ب كۆم ل شنگالێ نه‌هاتینه ڤه‌كرن و هه‌ستیێن قوربانیێن جینۆسایدا شنگالێ نه‌هاتینه ڤه‌شارتن، ئه‌ڤه بوویه ئه‌گه‌ر گۆرێن ب كۆم ژناڤ بچن و گۆت: “هه‌تا نوكه سێ گۆرێن ب كۆم یێن هاتینه تێكدان و ژناڤبرن، ئه‌و ژی گۆره‌كێ ب كۆم ژلایێ هێزێن عیراقی ڤه هاتیه تێكدان و گۆره‌كێ ب كۆم ژی هاتیه سۆتن و له‌هیان ژی گۆره‌كێ ب كۆم تێكدایه”.
ئاشكرا ژی كر كو حكومه‌تا عیراقێ گرنگیێ ب شنگالێ ناده‌ت، ژ به‌ركو شنگال ده‌ڤه‌ره‌كا كوردستانی یه و گرێدایی مادێ 140 یێ ده‌ستوورێ عیراقێ یه، هه‌روه‌سا ناكوكیێن ده‌ركی كه‌فتینه د ناڤ شنگالێ دا و هه‌تا نوكه به‌غدا به‌رامبه‌ر شنگالێ یا خه‌مساره.
ل دووڤ پێزانینان، ل شنگالێ 82 گۆرێن ب كۆم هه‌تا نوكه هاتینه دیتن، ده‌مێ ل هه‌یڤا ته‌باخا سالا 2014ێ ژلایێ تیرۆرستێن داعش ڤه خه‌لكێ شنگالێ تێدا هاتینه گولله‌بارانكرن، د قووناغا ئێكێ دا 20 گورێن ب كۆم هاتینه ڤه‌كرن، 357 رۆفات ژ ناڤ وان گۆرێن ب كۆم هاتینه ده‌رخستن و هه‌تا نوكه ب تنێ ناسنامه‌یێن 104 رۆفاتان ئاشكرابووینه.
