سێ یاریزانێن ئامێدیێ دێ نوونەراتییا كوردستانێ و ئیراقێ د مۆندیالەکا جیهانی دا كەن
چاڤەڕێ دهێتە كرن ئەڤرۆ سێ یاریزانێن یانەیا ئامێدیێ نوونەراتییا كوردستانێ و ئیراقێ د مۆندیالا جیهانی یا یانەیان بۆ یارییا كێك بۆگسینگێ دا بكەن ئەوا چاڤەڕێ یە هەڤڕكیێن وێ ب پشكدارییا هژمارەكا مەزن ژ هەلبژارتیێن جیهانی ل وەلاتێ تایلەند هەتا 12ێ ڤێ هەیڤێ بەردەوامبیت.
مەحفۆز ئیبراهیم جێگرێ سەرۆكێ فدراسیۆنا كیك بۆكسینگا ئیراقێ بۆ رۆژنامەیا ئەڤرۆ گۆت: بڕیارە ئەڤرۆ هەرسێ یاریزانێن یانەیا دهۆك ب نوونەراتییا هەرێما كوردستانێ و هەلبژارتیێ ئیراقێ ب كەڤنە د هەڤڕكیێن مۆندیالا جیهانی 2025ێ ل سەر ئاستێ هەلبژارتییان، ئەوا دێ ل پایتەختێ تایلەند بانكۆك هێتە كرن، هەرسێ یاریزانێن مە ئەو ژی، عەبدولرەزاق سەعید شێخۆ بۆ كێشا +91كگم ماستەر یا سیستەمێ لایك كیك، بەهزاد سالح ئەحمەد بۆ كێشا 71 كگم و ئەلند نەزیر عەزیز بۆ كێشا +91 كگم و هەردو یاریزان بۆ سیستەمێ لۆكیك دگەل شەش یاریزانێن دی یێن باشۆرێ ئیراقێ دێ هەڤڕكیێ ل سەر رێزێن پێشیێ و ناسناڤی كەن.
هەروەسان ناڤهاتی گۆت: ئەڤ قارەمانییە فەرمییە و پەسەندكرییە و لدووڤ بەرنامەیێ فدراسیۆنا كیك بۆكسینگا جیهانی wako بۆ وەرزێ ئەڤ سالە هاتییە دانان، ب هیڤییا وێ یەكێ یاریزانێن مە ب شێن دڤێ قارەمانیێ دا ئەنجامێن دلخوەشكەر بینن.
ژلایێ خوەڤە سالح كەكۆ ڕاهێنەرێ هەلبژارتیێ ئیراقێ و یاریزانێن پارێزگەها دهۆكێ گۆت: پشكدارییا سێ یاریزانێن یانەیا ئامێدیێ جهێ سەرفەرازیێ یە بۆ یانەیێ و كوردستانێ ژبەركو ئەو ئێكانە یاریزانێن كوردستانی دا دناڤ پێكهاتیێ ئیراقێ بۆ ڤێ قارەمانیێ، ل دووڤ بەرنامە و بەرهەڤیێن ڕاهێنانان تا ڕادەیەكێ باش هاتینە كرن و هەرسێ یاریزان ل دووڤ سیستەمێ یاریێن خوە بەرهەڤن، لەوما ژی گەشبینن ئەوا ل دووڤ پلانێ و بەرهەڤیێن زێدە بشێن دەستكەفتەكی بینن سەرباری ئەركێ وان ب سانەهی نینە ژبەركو باشترین یاریزانێن جیهانێ دێ پشكداربن.
