سێ یانێن چامپیۆنزێ بۆ دووماهی پلێته‌كا ده‌ربازبوونێ شه‌ڕی كه‌ن
ئه‌ڤرۆ،
چاڤه‌ڕێ دهێته كرن ئه‌ڤرۆ هه‌شت یاری ژ هه‌ڤڕكیێن گه‌ڕا شه‌شێ و دووماهیێ ژ چارچووڤێ قۆناغا كۆما یا قاره‌مانیا یانێن ئۆرۆپا قاره‌مانێن خولا چامپیۆنز لیگ بهێته ئه‌نجامدان و سێ یانه دێ هه‌ڤڕكیێ بۆ پلێته‌كا مایی یا ده‌ربازبوونێ بۆ قۆناغا 16ێ كه‌ن.
كۆما ئێكێ.
هه‌رچه‌نده هه‌ردو پلێتێن ده‌ربازبوونێ یێن ڤێ كۆمێ مسۆگه‌ر بووینه لێ دو تیمێن مایی دێ شه‌ڕی بۆ پلێتا سێیێ یا قاره‌مانیا خۆلا ئۆرۆپا كه‌ن ، دیاریا ئێكێ دا یانا لایبزیك یا ئه‌لمانی دێ مێڤانداریا یانا مانچسته‌ر ستی یا ئنگلێزی كه‌ت، لایبزیك ب چار خالان رێزا سێیێ دهێت هه‌مبه‌ری وێ یانا مان ستی ب 12 خالان سه‌رێ لیستێ دهێت و پلێتا ئێكێ مسۆگه‌ر كریه بۆ قۆناغا 16ێ، یانا ئه‌لمانی هیڤیێن ده‌ربازبوونێ نه‌ماینه لێ دێ بزاڤێ رێزا سێیێ پارێزیت ژبۆ پشكداریێ د قاره‌مانیا خولا ئۆرۆپا دا، ژلایێ خوه‌ڤه پاریس سانجێرمان ئه‌وا پلێتا دویێ مسۆگه‌ركری و رێزا دویێ دهێت ب هه‌شت خالان دێ مێڤانداریا كلۆپ برۆچ یا به‌لجیكایێ كه‌ت ئه‌وا چار خال كۆمكرین و رێزا چارێ دهێت، هه‌رچه‌نده ئه‌نجامێ یاریێ چو كارتیكرنێ ل خودانێن ئه‌ردی ناكه‌ت لێ یانا به‌لجیكایێ ژی هیڤیێن قاره‌مانیا خولا ئۆرۆپایێ ژ ده‌ست نه‌داینه، بۆ زانین هه‌ردو یاری دێ ل ده‌مژمێر 9:45 شه‌ڤ هێنه ئه‌نجامدان.
كۆما دویێ.
د ڤێ كۆمێ دا سێ یانه دێ شه‌ڕی بۆ پلێتا دویێ یا ده‌ربازبوونێ كه‌ن، یانا ئه‌تله‌تیكۆ مه‌درید یا ئسپانی د كاودانه‌كێ هه‌ستیار دایه و شه‌رڤانێن سیمیونی دێ بۆ ماوێ 90 خوله‌كان لبن گڤاشتنێن به‌رده‌وام دا بن نه‌بتنێ بۆ ب ده‌ستڤه ئینانا سێ خالان به‌لكو گوهێ وان ل ده‌نگۆباسێن یاریا دی یا كۆما خوه بن، ئه‌تله‌تیكۆ دێ بیته مێڤانا پورتۆ یا پورتۆگالی ئێك ژ یاریێن پری هه‌ڤڕكی یێن ئه‌ڤ شه‌ڤه دا، یانا ئسپانی ب چار خالان رێزا چارێ دهێت و پورتۆ ب پێنچ خالان رێزا دویێ دهێت، ئه‌تله‌تیكۆ مه‌درید پێدڤی ب سه‌ركه‌فتنێ یه لسه‌ر خودانێن ئه‌ردی و دڤێت هه‌ڤڕكا وێ ئه‌ی سی میلان یا ئیتالی ل گه‌ل لیڤه‌رپۆل یا نگلێزی تووشی خوساره‌تیێ بیت هه‌تا پلێتا دویێ یا ده‌ربازبوونێ مسۆگه‌ر بكه‌ن،ژبه‌ركو میلانێ چار خال هه‌نه و رێزا سێیێ دهێت و لیڤه‌رپۆل ب 15 خالان سه‌رێ لیستێ دهێت و ده‌ربازبوونا خوه مسۆگه‌ر كریه و دێ یاریه‌كا ئارام كه‌ت.
كۆما سێیێ.
هه‌ردو پلێتێن ڤێ كۆمێ بۆ قۆناغا 16ێ یا چامپیۆنزێ و پلێتا قاره‌مانیا خولا ئۆرۆپا مسۆگه‌ر بووینه و چو ئه‌نجامان كارتیكرنا خوه نابیت، ئه‌یاكس ئه‌مستردام یا هوله‌ندی خودانا سه‌رێ لیستا كۆمێ ب 13 خالان دێ مێڤانداریا سپۆرتینگ له‌شبۆنا یا پورتۆگالی كه‌ت ئه‌وا ب نه‌ه خالان رێزا دویێ دهێت، هه‌ردو یانا ده‌ربازبوونا خوه مسۆگه‌ر كریه و ئه‌نجامێ وان چو گوهۆرینا د رێزبه‌ندیێ دا په‌یدا ناكه‌ت، ژلایێ خوه‌ڤه بورۆسیا دورتمۆند یا ئه‌لمانی ئه‌وا پلێتا قاره‌مانیا خولا ئۆرۆپا مسۆگه‌ر كری و رێزا سێیێ ب شه‌ش خالان دهێت دێ مێڤانداریا یانا به‌شكتاش یا توركی كه‌ت ئێك ژ لاوازترین یانێن قاره‌مانیێ دا ئه‌وا بیێ خال رێزا چارێ دهێت، یانا توركی چو هیڤیێن ده‌ربازبوونێ نه‌ماینه و چوونا وێ بۆ ئه‌لمانیا بتنێ دێ په‌ردێ ل سه‌ر دووماهی پشكداریا خوه یا وه‌رزێ ئه‌ڤ ساله‌دا دانیت.
كۆما چارێ.
ئێك ژ یاریێن دی یێن ب هێز ئه‌وێن هه‌موو جه‌ماوه‌رێ وه‌رزشی چاڤه‌ڕێ بیت د یاریا ئه‌ڤ شه‌ڤه دا و دناڤبه‌را دو زلهێزێن ئۆرۆپایێ دا، یانا ریال مه‌درید یا ئسپانی ل سانتیاگۆ بێرنابیۆ دێ مێڤانداریا هه‌ڤڕكا خوه ئه‌نتر میلان یا ئیتالی كه‌ت، خودانێن ئه‌ردی 12 خالان هه‌نه و سه‌رێ لیستێ دهێت و ئه‌نتر ب نه‌ه خالان رێزا دویێ دهێت، سه‌رباری هه‌ردو یانا پلێتا ده‌ربازبوونێ بۆ قۆناغا 16ێ مسۆگه‌ر كریه لێ دێ شه‌ڕِێ وان بۆ سه‌رێ لیستێ بیت، سه‌ركه‌فتنا ئه‌نتر دێ سه‌رێ لیستێ ژ ریالێ وه‌رگریت لێ وه‌كهه‌ڤی و خوساره‌تی د به‌رژوه‌ندیا وێ دا نینه، هه‌مبه‌ری وێ یانا شێریف تراسبۆل یا مۆلدیڤیایێ پلێتا خولا ئۆرۆپا مسۆگه‌ر كریه پشتی ب شه‌ش خالان رێزا سێیێ مسۆگه‌ر كری و هه‌ڤڕكا وێ یا یاریا ئه‌ڤ شه‌ڤه دا یانا شاختار دۆنێسك یا ئۆكراین بتنێ ئێك خال هه‌یه و رێزا چارێ و دووماهیێ دهێت یا بێی هیڤیه سه‌رباری دێ یاریێ دناڤ ئه‌رد و جه‌ماوه‌رێ خوه دا كه‌ت ئه‌وا دێ بزاڤێ كه‌ت دووماهیه‌كا سه‌ركه‌فتی بیت.
بۆ زانین یاریێن كۆما دویێ و سێیێ و چارێ دێ ل ده‌مژمێر 11ێ شه‌ڤ هێنه ئه‌نجامدان.
