سێ سالە ل ئامێدیێ ئاڤاكرنا خانیێن گەشتیاری هاتیە راگرتن
ئەڤرۆ
ئەڤرۆ، ئەمیر ئەترووشی:
سەرۆكێ باژێرڤانیا ئامێدیێ راگەهاند، ئەڤە سێ سالە ئاڤاكرنا خانیێن گەشتیاری ل سنوورێ دەڤەرداریا ئامێدیێ هاتیە راگرتن و خەلكێ دەڤەرێ ژی دخوازن جارەكا دی رێ ب ئاڤاكرنا خانیێن گەشتیاری بهێتە دان.
ئەڤراز حەسەن، سەرۆكێ باژێرڤانیا ئامێدیێ بۆ ئەڤرۆ دیار كر، ل گۆرەی دووماهی بڕیارا هەژمارە سێ یا سالا 2018 كو ژ پەرلەمانێ كوردستانێ دەرچوویە، ئەو كەسێن ئەردێن وان نە تاپۆكری بن، نەشێن خانیێن گەشتیاری ل سنوورێ باژێرڤانیا ئامێدیێ ئاڤا بكەن و گۆت: «ب تنێ وان كەسان مافێ هەی یێن ئەردێ وان تاپۆكری، چونكو ل سنوورێ ئامێدیێ تەسویا ئەردی نینە و تاپوكرنا ئەردا ب شێوەیێ سەر ژ نوو (تسجیل مجدد) ژی ئەڤە پتری ١٠ سالایە هاتیە راوەستاندن».
ناڤهاتی خویا ژی كر، ژبەر ڤان ئەگەرێن ل سەری، ئەڤە سێ سالە مە هیچ مۆلەتەك بۆ ئاڤاكرنا خانیێن گەشتیاری ب كەسێ نەدایە و ئەڤە سێ سالە ژی پشكا هەرە مەزن یا ئەردێن سنوورێ ئامێدیێ راوەستیای ماینە».
