سێ پارزینگەھێن بەرھەم ئینانا گازا سپی دێ ھێنە دانان
ئه‌ڤرۆ نيوز:
بەرپرسێ سەنتەرێ پێزانین و ڤەکۆلینێن کوردستان ئاشکرا کر کو رێژا بەرھەم ئینانا پەترۆلا ھەرێمێ زێدەبوویە ژ بەر ڤێ چەندێ بڕیارە سێ پارزینگەھێن بەرھەم ئینانا گازا سپی و بەرھەمێ پەترۆلێ ل ھەرێما کوردستانێ بھێنە دانان و گۆت: “ئێک ژ وان پارزینگەھان دێ ل پارێزگەھا دھۆکێ ھێتە دانان”.
دکتۆر ئاراس خۆشناو، بەرپرسێ سەنتەرێ پێزانین و ڤەکۆلینێن کوردستان بۆ رۆژناما ئەڤرۆ ئاشکرا کر کو بڕیارە سێ پارزینگەھێن پەترۆلێ ل پارێزگەھێن دھۆک و ھەولێر و سلێمانیێ بھێنە دانان و گۆت: “ئەڤ پارزینگەھە دێ بنە ئەگەرێ وێ چەندێ کو ئێدی ھەرێما کوردستانێ بۆ گازا سپی پێدڤی ب بەرھەمێ بیانی نەبیت، چونکی ب رێیا ڤان پارزینگەھان دێ بەھرا رۆژانە یا گازا سپی ل ھەرێمێ ھێتە بەرھەم ئینان”.
ناڤھاتی ئاماژە دا وێ چەندێ کو ژ ئەگەرێ بلندبوونا رێژا بەرھەم ئینانا پەترۆلێ نوکە ھەموو کۆمپانیێن بیانی ڤەگەڕیاینە سەر کارێ خوە ل ھەرێمێ و گۆت: “ئەو کۆمپانیێن بیانی یێن ل ھەرێمێ کار دکەت دخوازن پارزینگەە ل ھەرێمێ بھێنە دانان داکو ئەو پەترۆلا دھێتە بەرھەم ئینان ھەموو نەچیتە ژ دەرڤە، چونکی ھەموو سالان حوکمەت رێژەکا مەزن ژ گازا سپی بۆ بەلاڤکرنێ ل سەر وەلاتیان ژ وەلاتێن جیران د کریت”.
