سێ پرێن کونکریتی ل ناحیا دینارتە دێ ھێنە دروستکرن
ئه‌ڤرۆ نيوز:
ل سنورێ ناحیا دینارتە ل قەزا ئاکرێ ئەڤ سالە جودا ل سالێن بۆری ھژمارەکا پرۆژەیان ھاتیە بجھکرن و سەرۆکێ باژێرڤانیێ گۆت: خواستەکا باش ل سەر دروستکرنا جھێن گوزاری ھەیە ل دەڤەرێ و رۆژانە چەندین کەس ب مەبەستا وەرگرتنا مولەتێ سەرەدانا مە دکەن.
فەواز میکایل سەرۆکێ باژێرڤانیا دینارتە ل قەزا ئاکرێ بۆ روژناما ئەڤرۆ گۆت: ئەڤ سالە سەرەرای بەردەوامیا قەیرانا دارایی ھژمارەکا پرۆژێن بچووک و ناڤخۆیی ل سنورێ گوند و گەرەکێن باژێرڤانیێ ھاتینە بجھکرن وەک کونکریت و قێکرنا جادێن نافخۆ ل دینارتە، ل گەل دروستکرنا ھژمارەکا بەنداڤێن ئاخێ بۆ کەرتێ چاندنێ و ئاژەلداریێ ل دەڤەرێ، بزاڤێن مە بەردەوامن ژ بۆ راکرنا ھەرسێ پرێن ئاسنی ل گەلیێ زەنتا کو جھێ وان ببیتە کونکریت، بەلێ ژ بەر قەیرانا دارایی و ھەتا نوکە نەشیاینە دەست پێ بکەین، ژ بەر کو چۆ بۆدجە نینن و چەندین جاران مەداخواز کریە ژ بۆ مەزاختنا کوژمەکی ھەتا وان پرا راکەین و ھەتا رادەکێ گەلی بەرفرەە بیت، ژ بەر کو گەلێی زەنتا بوویە جھەکێ گەشت و گوزاری و بەردەوام گەشتیار ل نافخو ناڤەراستا عیراقێ سەرەدانێ دکەن.
سەروکێ باژێر ڤانیا دینارتە ئاشکراکر: ژ بۆ جوانکرنا سیمایێ سەنتەرێ ناحیێ و پاراستنا کەسکاتیێ ھاتیە چاندن، بریارا قەدەغەکرنا تەرش و کەوالی ل ناڤ سەنتەرێ ناحیا ھاتیە دان و ھژمارەکا خودان ئاژەلا سۆزنامە ئیمزا کرینە، ھژمارەک ژی ب کوژمەکێ مادی ھاتینە سزادان، خودان تەرش و کەوال ب بھانەیا قەیرانا دارایی و دابینکرنا سپیاتی بۆ روژانە ب خودان دکەن، بەلێ د ھەمان دەم دا بەرەلا دکەن و دبینە سەدەم زیانێ بگەھینن کەسکاتیێ ناڤ سەنتەرێ ناحیێ.
فەواز گوت ژی: نوکە ئەم یێ کاردکەین و بزاڤا دکەین بۆ وێ چەندێ ھەموو گوندێن دەڤەرێ ببنە خودان باژێرڤانی و رۆژانە گلێش بھێتە راکرن یان حەفتیەکێ رۆژەکێ و ل جھەکێ تایبەت بھێتە دانان ژ بۆ پاقژ راگرتنا سیمایێ گوندی و پاراستنا ژینگەھێ.
