سێ چیڕۆكێن گەلەك كورت
سالح دۆسكی
خۆخاپاندن
بەرامبەر خۆدیكێ راوەستیا، سەروچاڤێن خۆ یێن ماندی د رۆناهییا بژالەبووی دا ددیت، هەر تیشكەكا رۆناهییێ رەنگڤەدانا پشكەك ژ خودییا وییە، لێ وێنەیێ تەمام وندایە. هەولدا پارچەیان كۆمڤەبكەت، لێ ژان ژ حەزا ئێكبوونا وی مەزنتر بوو، وێ كێلیكێ زانی كو مرۆڤ ب خۆ خۆدیكەكا شكەستییە، راستییێ هەمییێ دیار ناكەت هەتا هەمی قەتومەتێن خۆ قەبوول نەكەت.
دوور كەت، ب تنێ ما.. لێ هەر دیسان رازی نەبوو.. ل خۆدیكەكا دی گەڕیا ئەگەر خۆ یا خاپیبنۆك ژی بیت؛ بەلكو جوانتر خۆ تێدا ببینیت؛ بەرامبەر ئێكا دی راوەستیا.. لێ ئەڤ جارە هەما چ تێدا دیار نەكر.
هەڤسەنگی
سەرەرای كو هێشتا برینا چەنگێ وی یێ راستێ خوین ژێ دهەركیت هەر فڕی، بلبلی ل سەر تاكێ دارەكێ دادا، راستە بریندارە و ئازادییا جەستەیێ وی سنووداركریییە لێ روحا وی یا ئازادە، سەرەرای هەمی بەرگیری و بەرخۆدانێ و بدەستڤەنەبەردانێ؛ لێ هەم جا ئازدایا جانێ وی ب تنێ نەشیا بفڕینیت، خەونێن وی ب ئەسمانان ڤە بوون كابووسك.. لێ ل سەر ڕكمانییا خۆ ما و وهەر جارەكا دی فڕی، پشتی بیاڤەكێ نە كورت گەلەك ماندی بوو و نەشیا زێدەتر بەردەوامیێ بدەت فڕینا خۆ.. ژۆردە دناڤ نەهالەكا هشك و تێر كەڤر دا ب ئەردی كەت و ب تنێ ما.. و هندەك گیانەوەرێن درندە ل دەوربەرێن وی خۆ ل بەر ڤەدان.
گۆڕستانا هیڤییان
ژ رۆژا ئەڤ رێكە گرتی بەر خۆ زانی دێ گەلەك نەخۆشییان بینیت هەتا دگەهیت كۆپیتكێ، هندی د پەرتووكاندا خواندبوو كو یێ بڤێت بگەهیت ئارمانجا خۆ دڤێت شەڤان هشیار بیت و خۆ بوەستینیت و بەرخۆدانێ بكەت و بەردەوام بیت؛ بێ گۆمان دێ بەرهەمێ شرین یێ وێ ماندیبوونێ و وێ كەد و خوهدانێ بینیت.. پشتی بیست و چەند سالان ل سەر هەمان رێك و رێباز و زەحمەتكێشانێ مای، ل دوماهیێ راستی زانی.. پشتی مامۆستایێ وی یێ وەكو لێڤەگەرەكێ بۆ خۆ زانی و ئەوی ئەڤ هزرە كرینە د سەرێ ویدا و پەرتووك ددانێ و ئاراستە دكر ب ناڤسالەڤەچوویی گۆتیێ: رێك و هزرێن تە دروستن و یاسایا من بۆ تە پلانكری بۆ سەركەتنێ و ب جهئینانا هیڤییان مسۆگەرە وهەر تشتێ من نیشا تە دایی وهەر پەرتووكەكا من دایی تە بخوینی یان من گۆتی تە بخوینە دروستە.. ئەرێ بخودێ مامۆ لێ: نە ل ڤی وەلاتی.
