سێ ڕەنگێن ڕێبەندانێ
ئیمان لەزگین مستەفا
د شەڤەکا سار و سڕا ھەیڤا ڕێبەندانێ دا، شوون دەوسا سێ ڕەنگێن ژیانێ دناڤ بێدەنگییا بەفرا کۆلانێدا دھاتنە دیتن. پشتی دەهـ سالێن غەریبییێ د ناڤ تارییاتییا زیندانێدا، «ئازاد» ل کوژیکەکێ تارییێ کۆلانێ ڕاوەستیا بوو؛ نە وەک مرۆڤەکی، بەلکو وەکی پەیکەرەکێ بەری یێ بێ لڤین. چاڤێن وی، یێن کو د تارییا زیندانێدا بووینە دۆستێن مشک و دیواریان، نوکە ب وان پەنجەرانڤە د زیقن، یێن کو ب سالانە د زیندانێدا خەون پێڤە ددیتن.
بێدەنگییێ خۆ ایمان لزگین مصگفی
ب سەر كۆلانێ دادابوو. ئازادی نەدزانی بەرەڤ کیژ ئالییڤە بچیت، لێ ژ نشکەکێ ڤە، گرییا زارۆکەکێ ساڤا یێ ژ نوو ژ دایکبوویی ئەڤ بێدەنگییە پارچە پارچە کر و قەرەبالغ و هاتنوچوونا ژنان ل ئالییێ دی یێ کۆلانێ، ئازاد چەند گاڤەکان بەر ب پێشڤە بر. دەنگێ ژنەکێ د ناڤ سەرمایێ دا وەکی برویسیەکێ لێ دا:
«هەی ژارێ ساریا! د ڤێ جەمەدکا سار دا، دێ چ ل ڤی زارۆکێ پاش-باب کەت؟»
ئەو زارۆک نزانیت ل کیژ پارچەیا عەردی ب هەناسا وێ یا سار هاتیە سەر دنیایێ، کیژان کۆلانە و هەتا ناڤێ وێ ژی نزانیت! ئەو نزانیت کی د هەمبێزا وێ کۆلانێدا دکەتە گری و کییە دکەتە کەنی.
ئازادی بەردەوامی دا پێنگاڤێن خۆ و بەرەڤ پێشڤە چوو. ل ناڤەڕاستا کۆلانێ، ل ژێر چرایەکێ کزدا، سیبەرا دو ئەڤینداران دیار بوو. هەروەکی دووماهیک چرکێن ژیانێنە ل سەر ڤی عەردی، بێدەنگییەکا تەحل و بەرێخۆدانەکا ب ژان د ناڤبەرا واندا هەبوو، زمانێ وان لال ببوو و بێدەنگییێ شوینا ئاخفتنێ گرتبوو و دا بێژی تنێ ب چاڤن. بیرا ئازدی دوبارە ل ئەڤیندارا وی ئینا، ب هەر حالەكێ هەی پێن وی ئەو بەرەڤ ژڤانێ پەنجەرێ برنەڤە.
چاڤێن خۆ ژ وێ پەنجەرێ وەرنەگێڕان، کو ب سالانە ل بن سیبەرا وێ خەون ب ئازادیێڤە ددیتن. ل وێرێ، ل پشت شویشەیێن پەنجەرەکا دارین، «شلێر» ڕاوەستیا بوو. شلێر نە بتنێ کچەک بوو کو چاڤەڕێی زڤڕینا ئەڤیندارێ خۆ بکەت، بەلکو ئەو «شلێرا چیا» بوو کو د ناڤ دیوارێن مالا مام عەلی دا ژ خەم و چاڤەڕێبوونێ بێهێز و لاواز ببوو. دەستێن وێ یێن لەرزۆک ل سەر شیشەیا جامی بوون، وەک بێژیت بەفرا دەرڤە ژ دلێ وێ گەرمترە. د وان دەهـ سالێن غەریبیێدا، شلێر ببوو پاسەوانا ڕێکا کۆلانێ. هەر دەمێ دەنگێ پێنگاڤەکێ ل کۆلانێ هاتبا، بلەز دهاتە بەر پەنجەرێ و دگۆت: «قەی ئەڤە ئازاد بیت». پرچا وێ یا ڕەش، وەکی گورزەکێ سپی ب سەر ڕوو و ملێن وێدا هاتبوو خوار.
ئازاد حەیری مابوو: کا دێ دلخۆش بیت بۆ هاتنا وی زارۆکێ نوی؟ یان دێ خەمگین بیت بۆ حالێ وان هەردو ئەڤینداران؟ یان ژی، دێ ل پەنجەرا مام عەلی دەت دا کو جارەکا دی شلێرێ ژ دوورڤە هەمبێز بکەت؟
لێ ئەو یێ فێر بوو کو د ڤێ کۆلانێ دا، هەر دەرگەهەکێ ڤەبیت، پەنجەرەک دهێتە گرتن؛ و هەر مرۆڤەکێ ژ دوورییان نێزیک ببیت، دێ ل شوونا وی مرۆڤەکێ دی د ناڤ مژا غەریبیێ دا بەرزە بیت.
