سەبری سلێمان: چاڤەڕێ ژڤانێ خولێ نە و ئارمانجا مە بەرهەڤكرنا یاریزانانە
شاهۆ فەرید:
تیما فوتبۆلا یانەیا پیرس بەردەوامە ل سەر بەرهەڤیێن خوە بۆ ڤاڤارتنێن خولا پلا سێ یا ئیراقێ ئەوا دێ قوناغا ئێكێ تنێ ل سەر ئاستێ پارێزگەهێ ب پشكداریا 10 یانەیان هێتە كرن و هەڤڕكی دێ بۆ دو پلێتێن دەربازبوونێ بەر ب قۆناغا دویێ بیت و هەتا نوكە چو ژڤانێن دیاركری نینن.
راهێنەرێ تیمی سەبری سلێمان گۆت: هەتا نوكە ئەم نەهاتینە ئاگەهداركرن دێ كەنگی ڤاڤارتن هێنە ئەنجامدان، ئەكادێمیا یانەیێ پرە ژ یاریزانێن باش و خودان شیان و تیمەكا باش پێكبنین بۆ ئەڤێ خولێ، هیڤی و ئارمانجا مە یا سەرەكی پلێتا دەربازبوونێ یە، دێ كاركەین بۆ وێ چەندێ هەموو ئاستێن خولا دەربازكەین هەتا بگەهینە خولا ستێرێن ئیراقێ، كارگێریا یانەیێ دگەل یاریزان و راهێنەران هاریكارە بۆ نیشاندانا ئاستێن باش.
سەبری گۆت ژی: هەر راهێنەرەكێ دگەل یانەیا پیرس كار بكەت هیڤییا وی یا سەرەكی بەرز راگرتنا ناڤێ یانەیێ یە دهەر قارەمانی و خولەكێ دا، مەرەما مە دەستڤەئینانا ناسناڤی نینە یا سەر مە پێدڤی چێكرنا یاریزانایە، د ئەڤان چار سالێن بوری دا شیاینە چەندین یاریزانێن باش بەرهەم بینین و بەرهەڤ بكەین، ئەم كار ل سەر وێ چەندێ دكەین تیما ئاستێ ئێكێ هەموو ژ یاریزانێن خوە بەرهەڤبكەین و پێدڤیا مە پێشەكارا و بیانیا نەبیت، چاڤەریێ نە كادێ كەنگی دەمێ خولێ هێتە دیاركرن دا بشێن باشترین شێوە خوە بەرهەڤ بكەین.
