سەرباری خوسارەتیێ زاخۆ سەرێ لیستێ دهێت
قەیس وەیس:
تیما فوتبۆلا یانەیا زاخۆ ئێكەم خوسارەتییا خوە د قارەمانییا كۆپا كەنداڤی دا تۆماركر پشتی دگەل خودانێن ئەردی و جەماوەری یانەیا ئەلقادسیە یا كۆێتی ب گۆلەكێ بێ بەرانبەر، د یارییا واندا ئەوا ل شەڤا سێشەمبییا بۆری ژ چارچووڤەیێ یاریێن گەڕا پێنچێ كو دبیتە یارییا دویێ یا چوونێ ژ هەڤڕكیێن كۆما ئێكێ یا قارەمانیێ هاتیە كرن.
كوڕێن خابووری دەربازبوونا خوە مسۆگەر كرییە
تیما فوتبۆلا یانەیا زاخۆ سەرباری خوسارەتییا وێ بەرانبەر یانەیا ئەلقادسیە لێ بەردەوامە ل سەر پاراستنا ڕێزا ئێكێ، ئەوا ل سەرێ لیستا كۆما خوە دهێت ب كۆمكرنا 10 خالان ژ سێ سەركەڤتن، ئێك وەكهەڤی و خوسارەتیەكێ، یاریزانێن وێ شەش گۆل كرینە و دو گۆل ل سەر هاتیە تۆمار كرن، یانەیا ئەلقادسیە ئەوا د یارییا هاتنێ دا بەرانبەر زاخۆ ب3-1 تووشی خوسارەتیێ بوو لێ دڤێ یاریێ دا شیا تۆلێن خوە ڤەكەت، ل ڕێزا سێیێ دهێت ب كۆمكرنا حەفت خالان ژ دو سەركەڤتنان، وەكهەڤییەك و دو خوسارەتی، ژلایێ خوە یانەیا ئەلعەین یا ئیماراتی ب گۆلەكێ سەركەڤتن ل سەر سترە یا بەحرێنی ئینا و شیا جهێ خوە ل ڕێزا دویێ ب نەهـ خالان پارێزیت و یانەیا سترە یا بەحرێنی ب دو خالان ڕێزا چارێ و دووماهیێ دهێت.
ئەنجامێن كوڕێن خابووری د كۆپایێ دا
ب شێوەیەكێ گشتی تیما زاخۆ چار یاری كرینە و ئەنجام بڤی شێوەینە، دگەل ئەلقادسیە 3-1 ب سەركەڤت بوو ئەوا ل یاریگەها یانەیا دهۆكێ هاتیە كرن، دگەل خودانێن ئەردی سترە یا بەحرێنێ بێ گۆل وەكهەڤ دەركەڤتبوو، د یارییا سێیێ دا ل یاریگەها خوە زاخۆ ب دو گۆلێن پاقژ سەركەڤتن ل سەر عەین یا ئیماراتی ئینابوو، د قووناغا دویێ دا یانەیا زاخۆ یارییا دویێ بەرانبەر عەین ل ئیماراتێ ئەنجامدابوو و شیابوو ب سەركەڤیت ب گۆلەكێ بێ بەرانبەر، دهێتە پێشبینیكرن یارییا سێیێ و دووماهیێ ژ چارچووڤەیێ كۆمێ ل 17ێ ڤێ مەهێ مێڤاندارییا یانەیا سترە یا بەحرێنی بكەت.
یاریزانێ زاخۆ: گەشتێن بەردەوام كارتیكرن ل سەر ئاست و چەستەیی مە كرییە
محەمەد عەلی عەبوو یاریزانێ تیما فوتبۆلا زاخۆ گۆت: ئەنجامەكێ نە چاڤەڕێ كریبوو و ئەم نێزیكی سەركەڤتنێ بووین، ژبەركو ئەم باشتر بووین و گڤاشتنێن مە چێتربوون، لێ بێ چەنسیا مە نەشیان چو گۆلا بكەین، راستە مە دەربازبوونا خوە مسۆگەر كرییە بۆ قووناغا پێش دووماهیێ لێ هیڤیێن مە د ڤێ یاریێ دا ئەم ب سەركەڤین، دیاربوو تیما ئەلقادسییە یاری بۆ مرنێ دكر پێخەمەت دەستڤەئینانا سەركەڤتنێ، ژبەركۆ یارییەكا چارەنڤیس بوو بۆ یانەیا كۆێتی.
هەروەسان گۆت: مە یارییەكا دی یا گرنگ ل حەفتیا بهێت هەیە بەرانبەر یانەیا سترە ب هیڤی نە قەرەبوویا خالان بكەین و جەماوەرێ خوە ئاشت بكەین، ئاریشە وەستیان و گەشتێن بەردەوام كارتیكرن ل سەر ئاست و چەستەیی مە كرییە، ژبەركو د خولا ئیراقێ دا هەر چار رۆژان یارییەكە و تیما مە پتر هەموو یانەیان كەڤتیە دڤێ ئاریشێ دا ژباكۆر بۆ باشۆر و ناڤەڕاست.
هەلوەستێ كۆما دویێ بڤی شێوەیە
1- ئەلنزەهزە حەفت خال
2- ئەلریان شەش خال.
3- تەزامن حزرموت چار خال.
4- ئەلشباب سێ خال.
