سەربەست عەبدوللا ئێكانە كوردە دێ پشكداری د قارەمانیا نێڤدەولەتی دا كەت
قەیس وەیس:
یاریزانێ پارێزگەها دهۆكێ و هەلبژارتیێ ئیراقێ بۆ یاریا پایسكلان سەربەست عەبدوللا ئێكانە كوردە دێ پشكداریێ د قارەمانیا جەزائیر یا نێڤدەولەتی دا كەت ئەوا ئەڤرۆ هەڤڕكیێن وێ ب پشكداریا 17 هەلبژارتیێن جیهانی ژ وانا شەش یێن ئۆرۆپانە ئەوژی ئیتالیا، ئەلمانیا، فرەنسا، بەلجیكا، هۆلەندا و رۆمانیا كو دێ بشێوێ 10 قۆناغێن جودا هەتا 16 ئادارێ بەردەوامبیت.
تارق سەعید راهێنەرێ یاریزانێ كورد بۆ رۆژناما ئەڤرۆ گۆت: ل سەر ئەنجامێ رێزبەندیا پێشیێ یا یاریزانێ مە یێ پارێزگەهێ كو یاری بۆ یانەیا كۆیە دكەت سەربەست عەبدوللا وەكو یاریزانێ هەلبژارتیێ ئیراقێ بۆ قارەمانیا جەزائیر یا نێڤدەولەتی هاتیە داخوازكرن، پێنەڤێت ئەڤەژی وێ چەندێ دگەهینت هەردەم یاریزانێ پارێزگەهێ بوویە جهێ باوەریا هەلبژارتیێ ئیراقێ و ئەنجامێن وان یێن وەرزێن بوری ژی بەلگەنە ئەوێن ناسناڤێن جودا ل ئیران، ئیمارات، سوریا، تۆركیا و ئۆزپاكستانێ ب دەستڤە ئیناین.
ژلایەكێ دووڤە ناڤهاتی ئەوچەندە ژی دیاركر ئەڤ قارەمانیە ئێك ژ بهێزترین هەڤڕكیانە ل سەر ئاستێ جیهانێ تایبەت پشكداریا هەلبژارتیێن مەزن وەكو ئیتالیا، فرەنسا، ئەلمانیا، جەزائیر، هۆلەندا و بەلجیكا و گۆت: هەردەم یاریزانێ كورد شیایە ئەنجامێن سەركەفتی ب دەستڤە بینن، لێ دڤێت پشتەڤانی بوو هەبیت ژبەركو دەمێ دگەهنە قۆناغا پێشكەفتیان ئەم ل دهۆكێ مفایی ژێ نا وەرگرین نەچاربین بۆ یانەیێن كوردستانی و بەغدایی یاریێ بكەن.
