سەربەست لەزگین ل گەل نوونەرێن قوتابی و لاوان کۆمبوو
سەربەست لەزگین، ئەندامێ مەكتەبا سیاسی و بەرپرسێ مەكتەبا رێكخستنا پارتی ل پارێزگەها دهۆكێ ب ئامادەبوونا د. ڤیان سلێمان، ئەنداما كۆمیتا ناڤینا پارتی كۆمبوونەك ل گەل نوونەرێن هاتینە هەلبژارتن بۆ كۆنگرێ ئێكگرتنا هەردو رێكخراوێن لاوان و قوتابیان یێن سنوورێ مەكتەبا رێكخستنا پارێزگەها دهۆكێ ل بارەگایێ مەكتەبێ ئەنجام دا.
سەربەست لەزگین، بەرپرسێ مەكتەبا رێكخستنا پارێزگەها دهۆكێ د كۆمبوونێ دا دیاركر، لاو و قوتابی تۆێژەكا گرنگ و چالاكن د جڤاكی دا و خودان هەستەكێ بلندێ نەتەوەیی و نیشتمانی نە، هەروەسا د قووناغێن جودا یێن خەباتا رزگاریخوازا كوردستانێ دا رۆلەكێ هەمەلایانە گێڕایە و پشكداریەكا راستەوخۆ هەبوویە، هەروەسا د قووناغا ئەڤرۆ ژی دا و د خەباتا مەدەنی دا، رۆلەكێ گرنگ ل گەشەكرنا جڤاكی و سیاسی د هەرێما كوردستانێ دا دگێڕن.
بەرپرسێ مەكتەبا رێكخستنا پارتی ل پارێزگەها دهۆكێ هیڤیا سەركەفتنێ بۆ نوونەرێن هاتینە هەلبژارتن و كۆنگرێ ئێكگرتنا هەردو رێكخراوێن لاوان و قوتابیان خواست.
