سەردەمێ ڤێجارێ یێ ترامپی وەکو بەری نها نابیت
جێگرێ سەرۆکێ جڤاتا سیاسەتا دەرڤە یا ئەمریکا دیار کر، ب هاتنا ترامپی سەر دەستهەلاتێ دێ گوهۆڕینێن گەلەک مەزن ل رۆژهەلاتا ناڤین روو دەن، سەردەمێ ڤێجارێ یێ ترامپی وەکو بەری نها نابیت، ترامپی دڤێت گەلەک ژ ئاریشێن نها ل رۆژهەلاتا ناڤین چارەسەر بکەت، ژ بۆ ڤێ یەکێ ژی دڤێت گرۆپێن تیرۆرستی یێن بووینە مەترسی ب تەمامی بهێنە ژناڤبرن، ژ بەر ڤێ یەکێ ژی بەری دو رۆژان ترامپی هۆشداریەکا توند دا حەماسێ دا گرتیان ئازاد بکەت، چونکی هەکە هەتا وی دەمی حەماس گرتیان ئازاد نەکەت دێ ترامپ ب توندترین شێوە وان سزا دەت.
ئیلان برمن ئەو یەک ژی دیار کر، ئەوا نها ل سووریێ روو ددەت بەرهەمێ دەستێوەردانێن بەردەوام یێن ئیرانێ و رۆسیا نە، مخابن د سەردەمێ دەستهەلاتا بایدنی دا ژی ل سووریێ ئەوا پێدڤی ل دژی ئیرانێ نەهاتە کرن، بێگومان نها رەوشەکا نوو هاتیە پێش، ب هاتنا ترامپی دبیت گوهۆڕینێن گەلەک مەزن ل سووریێ ژی روو بدەن، چونکی ئەمریکا دەستان ژ سووریێ بەرنادەت، دبیت ترامپی پرۆژەکێ باش بۆ چارەسەرکرنا قەیرانا نها ل سووریێ هەبیت، لێ بێگومان د پرۆژەیێ ترامپی دا ئیرانێ و گرۆپێن سەر ب وێ چو رۆل نابن و هەکە ئاستەنگیان ژی بۆ ئەمریکا دروست بکەن دێ ئەمریکا ب توندی بەرسڤا وان دەت.
