سەركردەیێن چارچۆڤەیا هەماهەنگیێ هۆشداریێ ددەنە گرۆپێن چەكدارێن ئیراقی
سەركردەیێن هەڤپەیمانییا چارچۆڤەیێ هەماهەنگیێ یا شیعی هۆشداریێ ددەنە گرۆپێن چەكدار یێن ئیراقێ كو هێرشێن وان ل سەر ئیسرائیلێ، دێ ئەنجامێن مەترسیدار بۆ هەبن و دێ ئیراقێ تووشی هێرشێن ئەسمانی یێن دژوار كەت.
ئاژانسا فرانس پرێس ژ زاردەڤێ ژێدەرەكێ نێزیك ژ گرۆپێن چەكدار ل ئیراقێ، بەلاڤكر» سەرەكردەیێن هەڤپەیمانییا چارچۆڤەیێ هەماهەنگیێ یا شیعی، ل ڤێ دووماهیێ ل گەل سەركردەیێن گرۆپێن چەكدار یێن د ناڤ بەرەێ ( موقاوەمە) ل ئیراقێ كۆمبووینە و هۆشداری دایێ كو بەردەوامییا هێرشێن وان ل سەر ئیسرائیلێ دێ ئەنجامێن مەترسیدار هەبن و دێ ئیراقێ تووشی هێرشێن ئەسمانی یێن دژوار كەت».
وی ژێدەری ئاماژە ب وێ چەندێ ژی دا « د بەرسڤا سەركردەیێن هەڤپەیمانییا چارچۆڤەیێ هەماهەنگیێ، گرۆپێن چەكدار، داخواز ژ حوكمەتا ئیراقێ كر دەستێوەردانێ نەكەت و دوپاتكرن كو بەرپرسیارەتییا هەر دەرئەنجامەكی تنێ ل ستۆیێ واندایە».
ژ ئالیێ خوەڤە سەجاد جیاد، شرۆڤەكارێ سیاسیێ ئیراقی و ئەندامێ سەنتەرێ ڤەكۆلینێن ئینتەرناشنال ل نیویۆرك، گۆت» ل دووماهیێ دبیت ئیراقێ دوور ژ خواستا خوە بهێتە ڤەكێشان بۆ ناڤ شەڕ و ململانێ، لەوما ژ ئەگەرێ هێرشا ئیسرائیلێ ل سەر ژێرخانەیا ئابووری یان زەڤیێن پەترۆلی، حوكمەتا ئیراقێ هیچ ئەلتەرناتیفەكێ دی نابیت چبلی پشتەڤانیكرنا هەر بەرسڤەكا سەربازی دژی ئیسرائیلێ».
پشتی كوشتنا حەسەن نەسروللا، ئەمیندارێ گشتیێ حزبوللا یا لوبنانی ژ ئالیێ ئیسرائیلێ ڤە، بەرەیێ (موقاوەمە) یێ ئیراقی چەندین جاران ب درۆنان هێرش كریە سەر ئیسرائیلێ، د بەرامبەر دا لەشكرێ ئیسرائیلی گەف ل وان گرۆپان كر كو ژ دەڤەرێ و ئیراقێ هێرشیان دكەنە سەر ئاخا ئیسرائیلێ.
