سەركەفتنا زاخۆ گوهۆڕین ئێخستە د بەلانسا رێزبەندیێ دا
ئەڤرۆ
تیما تەپا پێی یا یانەیا زاخۆ شیا سەركەفتنەكا گرنگ ل سەر خودانا سەرێ لیستێ یانەیا تەلەبە بینت ب گۆلەكێ بێ بەرامبەر ژ چارچووڤێ گەڕا 17 ژ هەڤڕكیێن خولا پلا نایابا ئیراقێ ئەوا ل باژێرێ بەغدا هاتیە كرن، گۆلا زاخۆ ژلایێ هێرشبەرێ وێ فەرحان شكۆر د خولەكا 48ێ دا تۆماركر، ئەڤ ئەنجامە بوو ئەگەر بەلانسێ رێزبەندیا خولێ بهێتە گوهۆرین و یانەیا تەلەبە سەرێ لیستێ ژ دەست بدەت و پاشڤە بچیتە رێزا سێیێ ب 33 خالان و هەردو یانەیێن جەویە و شورتە مفا ژ سەركەفتنا زاخۆ بینن و ب 35 خالان رێزێن ئێكێ و دویێ وەربگرن.
ژلایەكێ دووڤە ئاست و ئەنجامێن یانەیا دهۆك بەردەوام بەر ئەنجامێن باشیێ دچیت و جهێ خوە ل رێزێن پێشیێ پاراستیە ئەوا ب كۆمكرنا 30 خالان رێزا شەشێ دهێت ب سەرپەرشتیا راهێنەرێ پارێزگەهێ سلێمان رەمەزان، یاریا بهێت یێن هەردو یانەیان ل رۆژا پێنچ شەمبی دهۆك دێ بیتە مێڤانا حدوود ل بەغدا و رۆژا ئەینی یانەیا زاخۆ دێ ل یاریگەها خوە یانەیا جەویە خودانا سەرێ لیستێ مێڤان كەت بهیڤیێن ئێخستنا وێ ژی ژرێزبەندیێ.
د داخویانیەكێ دا حەیدەر عەبدولئەمیر بۆ رۆژناما ئەڤرۆ دیاركر ئەو رژدن بەردەوامیێ بدەنە ئەنجامێن باش و هەر یاریەكا دكەن قەربوویە بۆ ژ دەستدانا ئەوان خالێن دەستپێكا خولێ داین و گۆت: بوو مە یاگرنگ ئەو پشتەڤانیا مەعنەوە و مادی یا كارگێریا یانێ بەردەوامە كو ئێك ژ خالێن گرنگە و پشتەڤانیا جەماوەرێ یانێ خالەكا دی یا زلهێزێ یە كو یاریزانێ مە باشترین شێوە ئاستێ خوە نیشان بدەن، دەستخوەشیا كارگێری و جەماوەری دكەم و گەشبینم دێ بەردەوامبین و ناهێلین یاریزان ژ مەغرور بن دەمێ سەركەفتنان، هیڤییا مە ئەوە بەردەوامین ل سەر ئەنجامێن خوە.
