سەرنجەك ل سەر وێنەیەكێ خەمناك و كاریگەر
دلهین حەمدی
مە هەمیان ئەو دیمەن دیتن ل وەختێ كۆمبوونا (تۆم باراك) نوونەرێ سەرۆكێ ئەمریكایێ بۆ كاروبارێن سووریێ ل گەل سەركردایەتیا كوردان ل باشۆر و ڕۆژئاڤا، دیمەن گەلەك د خەمگین و جهێ سەرسۆڕمانێ بوون و بەلاڤكرنا وان كارەكێ گەلەكێ باش بوو، چونكی گەلێ كورد سەركردەیێن خۆ ل بەرانبەری نوونەرێ وەلاتەكێ زلهێز دا بێ ئۆمێد و خەمگین دیتن و وەختەكێ گەلەكێ دژواربوو؛ لێ گەلێ كورد هشیار كر كو هێرش و گەف ل سەرن و هەروەسا گەلێ كورد هشیاركر ژ بۆ بەرگیری كرنی و خەباتكرنێ پێخەمەت خەونا سەد سالی كو ئەو ژی دەولەتبوونە.
كەسێ نەدزانی چ د كۆمبوونێ دا هاتبوو گۆتن و بەحسكرن؛ لێ دیمەنێن كۆمبوونێ هەمی تشت ژ بۆ كوڕدان ڕۆنكرن و گەلێ كورد زانی كو دوژمنێن وان و زلهێزەكێ دڤێن چارەنڤیسەكێ تاری و دژوار بۆ درست بكەن و دیمەنێن خەمگینێن كۆمبوونێ بوونە بنەمایەك كو دڤێت كورد ئێكگرتی بن، پشتی كۆمبوونێ كاك (مەزلۆم عەبدی) بەرەف دیمەشقێ ب ڕێ كەفت و ل وەختێ زڤڕینێ بانگەوازییەكا كۆرت بەلاڤ كر و چیرۆك هاتە گۆهڕین و بانگەوازیا كاك مەزلۆمی هندا كوردانە و شكۆمەندانە بوو گەلێ كورد ل هەمی دونیایێ ل مالێن خۆ هاتنە دەرێ و جیهان تووشی سەرسۆڕمانێ كرن، ئەڤ وێنە ب تنێ هێما نینە بۆ نۆكە و ئەو وەختێ ئەم تێدا دژین هەست پێ دكەین بەلكی وێنە هێمایەكە بۆ سەد سالیا مێژوویا كوردان پشتی لۆزانێ، ئەو خیانەتا نۆكە مە دیتی د كۆمبوونا پیرمام دا ل سەر دەستێ (تۆم باراك)ی هەمان ئەو خیانەتە یا كو ل سەردەمێ شێخ سەعیدێ پیران و سەید ڕەزایێ دێرسمی و سمكۆیێ شكاك و پێشەوا قازی محەمەد و مەلا مستەفایێ بارزانی و عەبدولا ئوجەلان و گشتپرسیا سەرۆك مەسعود بارزانی هاتیە كرن لەوڕا یا پێدڤی و گرنگ وەك هەناسەیێ نوكە ژ بۆ كوردان ئێكگرتنا بنەڕەتی یە.
یا گرنگە ئەو وێنە و ئەو دیمەن هەستێن مە بلڤینن و ڤێ پرسیارێ ل دەف مە درست بكەن، ئەم وەك كورد د ناڤخۆیا خۆ دا چ دكەین و ب چ ڤە دمژویلین؟ جیهان چاوا بەرێ خۆ ددەتە مە؟ ئەو دیمەنێن نوكە ئەم دبینین دڤێت ژ دیمەنێن شۆڕشێن شێخ سەعیدێ پیران و قازی محەمەد و سمكۆیێ شكاك و مەلا مستەفایێ بارزانی و سەید ڕەزایێ دێرسمی و عەبدولا ئوجەلان و گشتپرسیا سەرۆك مەسعود بارزانی خەمگینتر بن كو مە نە دیتینە و هەرگاڤ ئیهانەیا سەركردایەتیا سیاسی یا خۆ دكەین، بۆچی ئەو خیانەتا ل كوردان هاتیە كرن كێمتر سەرنج لسەر هەبوویە؟ ئایا یێن بەری مە ژ مە بهێزتر نەبوون؟ ژ مە شەڕكەرتر نەبوون؟ ئەرێ بۆچی د وەختەكێ كورت مەودا دا تووشی شكەستنێ دبوون؟ ئەڤ پرسیارە مە نەچار دكەت كو هەر هزر د ئێكبوونێ دا بكەین و ئەوا د دیرۆكێ دا ب سەرێ كوردان هاتی ژ ئەگەرێ بەربەلاڤیێ و نەئێكبوونێ دڤێت ئەم نها وانەیەكا ب ڕامان بۆ خۆ ژێ وەرگرین و هەولا ئێكگرتنەكا سەركەفتیانە و سەرانسەری بدەین و شەرمزارییەكا گەلەكا مەزنە هەر دوژمنێن مە ل سەر مە زال ببن، ئەرێ ما هەر ئەم دێ ل بەرانبەری دوژمنێن خۆ شكێین؟ ل دوماهیێ دێ بێژین بەدیلێ ئێكگرتنێ هەر ئێكگرتنە و چ ڕێكێن دیتر نینن ژ بۆ زالبوونێ ب سەر دوژمنان دا.
