سەرکردەکێ بزاڤا ئاشۆری: چەکدارێن مە ب سەر حەشد شەعبی و وەزارەتا پێشمەرگەی ڤە نینن
ئەڤرۆ:
ئەندامەکێ مەکتەبا سیاسی یا بزاڤا دیموکراتی یا ئاشۆری دداخۆیانیەکێ دا بۆ رۆژناما ئەڤرۆ راگەھاند، بزاڤا وان ھێزەکا چەکدار یا ھەی و رەت کر ب سەر میلیشیێن (حەشد شەعبی) ڤە بیت، ئاماژە دا ژی ھەکە قانوونا (زێرەڤانێن نیشتمانی) ل عیراقێ ھاتە پەسەندکرن، ئەو ھێز دێ چیتە ب سەر ھێزێن زێرەڤانێن نیشتمانی ڤە، ھەڤدەم ژێدەرەکێ سیاسی یێ مەسیحی ئاماژە دا وێ چەندێ دو کەتیبێن مەسیحی دناڤ حەشد شەعبی دا یێن ھەین، چەکدارێن بزاڤا ئاشۆری ژی دبیت ب سەر (حەشد شەعبی) ڤەبن.
دکتۆر دورەید حکمەت ئەندامێ مەکتەبا سیاسی یا بزاڤا دیموکراتی یا ئاشۆری بۆ ئەڤرۆ گوت” ھێزا مە یا چەکدار ژ ٣٠٠ کەسان یان پتر پێک دھێت ب ناڤێ ھێزا دەشتا نەینەوا، نە ب سەر (حەشد شەعبی) و نە ژی ب سەر (حەشد وەتەنی) یا سوننی و نە ب سەر وەزارەتا پێشمەرگەی ژی ڤە نینە، بەلکو ئەو ھێزب تنێ یا ب سەر بزاڤا مە ڤە”.
دورەید حکمەتی خۆیاکر ژی” ھێزا مە ل سەربازگەھەکێ وەزارەتا پێشمەرگەی ل چەمچەمال یا ھاتیە مەشقدان و ژ ٣٠٠ کەسان یان پتر پێک دھێت”.
ناڤبری دیارکر کو مەسیحیان ھێزەکا دی ژی یا ھەی ب ناڤێ (پلنگێن زێرەڤانی بغدیدا) کو ب سەر وەزارەتا پێشمەرگەی ڤەنە و یێن ھاتینە مەشقدان و گەڕا ئێکێ ژ وێ ھێزێ ژ مەشقدانێ یا دەرچووی”.
کەریم نوری پەیڤدارێ (حەشد شەعبی) بەری نوکە د داخۆیانیەکێ دا بۆ ئەڤرۆ گوتبوو “چەکدارێن مەسیحی ژی یێن دناڤ حەشد شەعبی دا ھەین”.
ژێدەرەکێ سیاسی یێ مەسیحی د داخۆیانیەکێ دا بۆ رۆژناما ئەڤرۆ ھەبوونا چەکدارێن مەسیحی دناڤ (حەشد شەعبی) دا پشتراستکر و گوت” دو کەتیبێن مەسیحی دناڤ (حەشد شەعبی) دا یێن ھەین ب ناڤێ (بابلیۆن و عیسا بن مریەم) کو سەرکردێ ئێک ژوان ناڤێ وی رەیان، یان ژی (شێخ رەیان ئەلکلدانی) یە، لێ ب دروستی نزانین کا چەکدارێن وان کەتیبان مەسیحیێن بەغدانە یان یێن جھەکێ دی نە، لێ ھندەک دبێژن چەکدارێن بزاڤا ئاشۆری ژی یێن ل گەل وان و مووچەیێن وان ژی ل گەل وانن، لێ ب دروستی راستیا ڤێ چەندێ نزانم”.
زێدەتر گوت”” بزاڤا ئاشۆری دبێژیت چەکدارێن وان د سەربەخوەنە و ب سەر چو لایەنان ڤە نینن، لێ ئەم د پشت راست نینین ژ ڤێ چەندێ، ژ بەر کو ئێکەتی نیشتمانی کوردستان سەربازگەھەک بۆ مەشقدانێ بۆ وان ل چەمچەمال ڤەکربوو و ھەموو پێدڤیێن دی بۆ دابین کربوون”.
ئەیاد بەرواری بۆ رۆژناما ئەڤرۆ ئەڤ راپۆرتە بەرھەڤ کریە.
