سەرکەفتنا قووناغا ئاشتیێ د بەرژەوەندیا کوردان و تورکان دایە
سیاسەتمەدارەکێ کورد دیار دکەت، نها هەم ئالیێ تورک و هەم ژی ئالیێ کورد گەهشتینە ڤێ باوەریێ کو ب شەڕی و توندوتیژیێ چو پرسەک ناهێتە چارەسەرکرن و قووناغا ئاشتیێ ب رەنگەکێ باش بەردەوام دکەت و سەرکەفتنا قووناغا ئاشتیێ د بەرژەوەندیا کوردان و تورکان دایە.
ئیدریس بالوکەن ئەندامێ بەرێ یێ پەرلەمانێ تورکیا و سیاسەتمەدارێ کورد ل تورکیا د داخویانیەکێ دا بۆ میدیا سکوپ دیار کر، ب سالانە ل تورکیا شەڕەک دژوار هەبوو و زیانێن گەلەک مەزن ژی گەهشتنە تورکیا و کوردان، لێ نها قووناغەکا نوو دەستپێکریە، گەنگەشەیێن گەلەک باش سەبارەت ب قووناغا ئاشتیێ دهێنە کرن، کارێن باش ژی هەتا نها هاتینە کرن و بێگومان ئەو یەک ژی گەلەک گرنگە و گۆت: (یا گرنگ نها ئالیێ کورد و تورک ژی هەر دو گەهشتینە ڤێ باوەریێ ئێدی سەردەمێ شەڕی و ئالۆزیان نەمایە و دڤێت پرسێن هەی دوور ژ شەڕی و ب رێیا دانوستاندنان بهێنە چارەسەرکرن، ئەو یەک ژی گەلەک گرنگە، هەکە چو ئالۆزیێن نوو روو نەدەن د دەمەکێ نێزیک دا دێ ئەنجامێ قووناغا ئاشتیێ دیار بیت و بێگومان دێ کاریگەریا خوە ل سەر هەموو تورکیا و رۆژهەلاتا ناڤین ژی هەبیت).
سیاسەتمەدارێ کورد ئەو یەک ژی دیار کر، پێکئینانا کۆمسیۆنا ئاشتیێ ل پەرلەمانێ تورکیا کارەک گەلەک مەزنە، ئەو یەک نیشا ددەت هەموو هێزێن کو نوونەرێن وان د کۆمسیۆنێ دانە پشتەڤانیێ ل ئاشتیێ و مافێن کوردان دکەن، بێگومان بەری نها تشتەک وەسا نەبوو، ئەو یەک ژی نیشا ددەت گوهۆڕینێن باش د هزرا سیاسەتمەدارێن تورک ل هەمبەر دا کوردان دروست بوویە و گۆت: (زمانێ دەستهەلاتێ ل هەمبەر کوردان ب رەنگەکێ باش هاتیە گوهۆڕین و مرۆڤ هەست ب ڤێ یەکێ دکەت د ناڤ هەموو هێزێن سیاسی یێن ل تورکیا دا ل هەمبەر مافێن کوردان گوهۆڕینەک باش هەیە، ئەو توندرەویا جاران نەمایە، ئەو یەک ژی دشێت ببیتە دەستپێکەکا گەلەک باش ژ بۆ چارەسەرکرنا پرسا کوردی و بێگومان نها هەر کەس دزانیت ئێدی سەردەمێ شەڕی و ئالۆزیان نەمایە، ب چارەسەرکرنا پرسا کوردی دێ گەلەک پرسێن دی ژی ل تورکیا هێنە چارەسەرکرن).
