سەرۆكێ نوونەراتیا حوكمەتا هەرێمێ پێشوازی ل جێگرا بالیۆزێ هولەندا ل بەغدا كر
فارس عیسا، سەرۆكێ نوونەراتیا حوكمەتا هەرێما كوردستانێ ل بەغدا، دوهی 3/6/2024 ل نڤیسنگەها خوە یا تایبەت پێشوازی ل (لتیتا فان ئاش) جێگرا بالیۆز و كار ب رێكەرا بالیۆزخانەیا هولەندا ل بەغدا كر.
د روونشتنەكێ دا هەردولا بەحسێ رەوش و پێشهاتێن هەرێما كوردستانێ و دەڤەرێ و ئیراقێ كر، هەروەسا بەحسێ پەیوەندیێن دیرۆكی یێن هەرێما كوردستانێ ل گەل وەلاتێ هولەندا هاتە كرن و داكوكی ل سەر وێ چەندێ هاتە كرن، كو وەلاتێ هولەندا دێ بەردەوام پشتەڤانیێ ل دۆزا كوردی كەت، هەروەسا بەحسێ دووماهی سەرەدانا مەسرۆر بارزانی، سەرۆكێ حوكمەتا هەرێما كوردستانێ بۆ بەغدا و كۆمبوونێن وی ل گەل مەزنە بەرپرسێن ئیراقی و سەرۆك و بەرپرسێن حزب و لایەنێن سیاسی هاتە كرن.
د تەوەرێ دووماهیێ دا بەحسێ مووچەیێن فەرمانبەرێن هەرێمێ و پشكا هەرێمێ د بودجەیا ئیراقێ دا و رێككەفتنا شنگالێ و ئاساییكرنا رەوشا دەڤەرێن سنوورێ مادەیێ (140) و داخستنا كەمپێن ئاوارەیان و راگرتنا پترۆلا هەرێما كوردستانێ و هەلبژارتنێن بهێن یێن پەرلەمانێ هەرێما كوردستانێ و پەیوەندیێن د ناڤبەرا هەولێر و بەغدا دا بۆ چارەكرنا ئاریشەیان ل دووڤ دستووری و یاسایێ هاتە كرن.
