سەرۆكێ نوو یێ یانەیا زاخۆ دەست ب كاربوو
ئەڤرۆ
زاخۆ، عەلی حاجی:
د كونگرەیێ رۆژنامەڤانی دا بلند شەفیق دەست ژ پۆستێ سەرۆكاتیا یانەیا زاخۆ یا وەرزشی بەردا و ل جهێ وی عەمار فەرهاد ب وەكالەت هاتە دانان.
ل دەستپێكێ بلند شەفیق گۆت: ئەو رەخنەیێن ل دەستەیا كارگێریا یانەیا زاخۆ دهاتنە گرتن نە ل سەر بنەمایێن وەرزشێ بوون بەلكو هندەك بنەمایێن دیتر بوون و هەمی دەمان ژی مە لایەنیێن پەیوەندیدار ئاگەهداركرن لێ وەكو پێدڤی كار نەهاتە كرن، ئەو دژایەتیا ل یانێ د هاتە كرن كارەكێ مەترسیدار بوو، هەر كوژمەیەكێ پارەیی هاتیە دناڤ یانێ دا ئەز ژێ بەرپرسم ژبەركو هەمی تشتەك ب روونی هاتیە كرن و ل سەر راوەستیاینە، هەیڤانە100 هەتا 150 ملیون دیناران بوون بۆ تیما تەپاپیێ ئەڤە ژی كوژمەیەكێ كێم بوو كو ل دووڤ شیانان بوو دهاتە دابینكرن و بەرامبەر وی پارەیێ بۆ مە هاتیە خەرچ كرن كێمترین پارە ل چاڤ یانەیێن دیتربوویە و ئەو كارێ هاتیە ئەنجامدان نەبتنێ ب پارەیی دهاتە كرن بەلكو ب رژدیا مە ژی كار دهاتە كرن.
ئەو چەندە ژی گۆت: بابەتێ پروژەیێ یانێ هەتا نوكە نەهاتیە چارەسەر كرن لێ بەر ب قوناغا دووماهیێ ڤە چوویە هیڤیدارین ب چوونا مە ئێكگرتن و ڤیانا مە زێدەتر لێ بهێتە كرن و پێشنیار دكەم بۆ كەسێن شولەژێ ل زاخۆ كەسانێن نموونە بیننە دناڤ وەرزشێ دا.
ل دور دەستكاربوونا خوە وەكو سەروكێ دەمكی یێ یانەیێ عەمار فەرهاد گۆت: جهێ دل نەرەحەتیا مەیە كو ئەڤرۆ بلند شەفیق دەست ژ كار بكێشیت، وەكو یاریزانەكێ دێرین یێ یانەیا زاخۆ مە دخواست خزمەتا یانێ كربایە ب گورەی وێ سەربورا مە هەیی و ئەو چەندە ژی پێدڤی ب دەمی هەبوو، دێ وەكو سەروكێ یانێ مینم ب شێوەیەكێ دەمكی هەتا كو دووماهیا ڤی وەرزی و هەتا كو پلانەكا نوو بۆ دەستەیەكا نوو دهێتە دانان، چ كەسەكێ دناڤ دەستەیا یانێ دا مەرەمێن تایبەت نینن بەروڤاژی مە خزمەتكرنا یانێ دڤیا و سوز هاتیە دان ژ لایەنێن پەیوەندیدار كو هاریكاریێن باشتر هەبن بۆ دەستەكا نوو یا یانێ.
