سەرۆكێ یانەیا ئافرەتێن دهۆكێ ڕەدكر ئەو دوبارە خۆ بەربژار بكەت
قەیس وەیس:
بڕیارە ئەڤرۆ سێ یانەیێن وەرزشی ل سنۆری پارێزگەها دهۆكێ دێ دەست ب هەلبژارتنێن خوە یێن وەرزێ نوو بۆ چار سالێن داهاتی كەن ژبۆ ژێگرتنا كارگێرییێن نوو یێن یانەیێ، ئەوا دێ هەتا شەمبییا بهێت پرۆسەیا هەلبژارتنان یا بەردەوامبیت.
ل دووڤ خشتەیێ هاتیە بەلاڤكرن چاڤەڕێ دهێتە كرن ئەڤرۆ هەر سێ یانە یێن دێ هەلبژارتنان كەن، ل دەمژمێر 10 سپێدێ یانەیا سێمێل دێ هەلبژارتنێن خوە ل هۆلا رەوشەنبیری ل باژێرێ سێمێلێ كەت، پرۆسەیا دویێ یا هەلبژارتنان دێ ل دەمژمێر دو پشتی نیڤرۆ یانەیا ئافرەتێن دهۆكێ دێ ل هۆلا گرتییا لژنەیا ئۆلمپی تایێ دهۆكێ كەت، پرۆسەیا سێیێ یا هەلبژارتنان ل دەمژمێر چارێ ئێڤاری یانەیا سەنحاریب دێ ل هۆلا گرتییا بنگەهێ لاوان كەت.
د دیدارەكا رۆژنامەڤانی دا بۆ ئەڤرۆ سەردار سالح سەرۆكێ یانەیا ئافرەتێن دهۆكێ ڕەدكر ئەو دوبارە خۆ بۆ پۆستێ سەرۆكێ یانەیا ئافرەتێن دهۆكێ بەربژاربكەت و گۆت: دێ دەلیڤێ دەمە كەسەكێ دی ئەو خۆ بۆ پۆستێ سەرۆك یانە بەربژار بكەت، دو سالێن بۆری یێن سەرۆكاتییا من، دگەل هەڤالێن خۆ ئەم شیاین دو ناسناڤێن كوردستانێ و ئێكا پارێزگەهێ یێ یارییا فوتسالێ ب دەستڤە بینن دگەل ناسناڤێ قارەمانیێن نێڤدەلەتی و عەرەبی و ئیراقێ بۆ یارییا تیكۆنجتسۆیێ، داخوازا سەركەڤتنێ بۆ كارگێرییا نوو دكەم.
هەروەسان ناڤهاتی گۆت: تایبەتمەندییا من یارییا باسكێت بۆلێ یە، وەكو یاریزان، دووڤدا ڕاهێنەر كو چەندین سالان ل یانەیێن جودا یێن پارێزگەهێ و هەولێرێ كرییە، بۆ من خۆشترە كارێ كارگێریێ و راهێنەراتیێ د یارییا باسكێت بۆلێ دا بكەن ژبەركو بوویە پشكەك د ژیانا من دا.
ل دووڤ زانیاریێن بەردەستێ رۆژنامەیا ئەڤرۆ، دبیت چو هەڤڕكییەكا بهێز دناڤبەرا بەربژاران دا نەبیت بتنێ ل هندەك ئەندام زێدەبن و پرانییا یانەیێن پشكدار د پرۆسەیا هەلبژارتنان دا دێ ب لیستێن تمامەكر هێنە داناڤ هەلبژارتنان دا ئانكو پرانییا وان كەسێن پێشتر دگەل یانەیێ دێ بۆ چار سالێن دیتر مینن، دهێتە پێشبینكرن سەرۆكێن یانەیێن سێمێلێ د. هاریوان عابد و سەرۆكێ یانەیا سەنحاریب داود رەبەن ل پۆستێ خوە بمینن ژبەر رۆلێ وان یێ كاریگەر دگەل یانەیێن وان.
بۆ زانین ل دووڤ ڕێنمایێن هەلبژارتنان بتنێ ئەوان كەسێن مافێ دەنگدانێ هەنە یێن ناڤێن وان د لیستا گشتی دا ئەوا پێشتر بۆ ڕێڤەبەریا وەرزش دهۆك هاتییە هنارتن، ئەو كەسێن ب دەركەڤن ژ پێنچ ئەندامان كێمتر نەبیت، هەكە كێمتر بوو دێ دوبارە هێتە كرن و نەهـ ئەنداما زێدەتر نابیت، دووڤدا دێ كارگێرییا نوو د كۆمبوونا خوە یا ئێكێ دا سەرۆك، جێكر، سكرتێر و ڕێڤەبەرێ دارایی دەستنیشانكەن ب شێوەیێ دەنگدان و دێ بۆ ڕێڤەبەرییا ناڤهاتی ب نڤێسارەكا فەرمی هێتە هنارتن.
بریارە ئەڤرۆ ژی سێ یانەیێن ل سەنتەرێ دهۆكێ دێ هەلبژارتنێن خوە كەن، ل دەمژمێر 10ی سپێدێ یانەیا پۆلی تەكنیك، ل دەمژمێر دو پشتی نیڤرۆ یانەیا میدیا، ل دەمژمێر چارێ ئێڤاری یانەیا فرۆكەڤانییا دهۆك دێ هەلبژارتنێن خوە كەت.
