سەرۆكێ یانەیا ناسرییە: یاریزانێن كورد شیانێن باش هەنە و دێ مفایی ژێ وەرگرین
قەیس وەیس:
د داخویانیەكێ دا سەرۆكێ یانەیا ناسرییە یا باشۆرێ ئیراقێ دیار كر گرێبەست دگەل 12 یاریزانێن كورد یێن خەلكێ هەرێما كوردستانێ پشتگەرمییە ب شیانێن وان و دێ مفایی ژێ وەرگرن، ئەڤچەندە هات پشتی لڤێ دووماهیێ بشێوەكێ بەرچاڤ د ماوەیێ سێ حەفتیان دا یانەیا وان گرێبەستا ب كۆم دگەل یاریزانێن كورد ئیمزاكری خوە بەرهەڤكرنا تیما وان یا فوتبۆلێ بۆ وەرزێ نوو یێ 2024-2025 یێ خولا پلا نایابا ئیراقێ ئەوا دێ كوڕێ باژێرێ هەولێرێ ڕەوەند عەبدولخالق وەكو ڕێڤەبەرێ تیمێ دگەل دا بیت.
زێدەتر ئێحسان عەلی گۆت: پێخوەشحالم ئەڤ سالە تیما مە ژ هەر لایەكی ڤە یا جودایە، 60% یاریزانێن خودان شیان و شارەزا ژ هەرێما كوردستانێ نە و گەشبینم دێ مفایەكێ باش ژێ وەرگرین، لەوما ژی دێ بەرهەڤیێن مە بۆ وەرزێ نوو جودا بن و بهێزتربن پێخەمەت گەهشتن بۆ خولا ستێرێن ئیراقێ، من باوەری ب شیانێن هەموو یاریزان هەیە و راهێنەرێ تیمێ سائیر جەسام و هاریكارێ وی رەوەند عەبدولخالق خودان شیانن و دزانن دێ چەوا سەرەدەریێ دگەل هەر یارییەكێ كەن، هەروەسان دێ ئارمانجا كارگێریێ و جەماوەری ب جهئینن ئەوژی دەربازبوون بۆ خولا ستێرێن ئیراقێ.
بۆ زانین ئەو یاریزانێن گرێبەست دگەل هاتینە ئیمزاكرن ئەو ژی هەر ئێك ژ بارزان یوسف، دلێر حاتم گۆلپارێزان، هەروەسان هێلا بەرەڤانیێ ڕەوان محەمەد، هەردی سیامەند، محەمەد شیرزاد، هەرێم تەحسین، ل هێلا ناڤین، هێمن نازم، عەباس حوسێن، ئەحمەد سەلاح، ل هێلا هێرشبەریێ عەبدولقادر ئەیوب، سەفەر سلێمان و بارزان شێرزان.
