سەرۆکێ حوکمەتێ 859 ملیۆن دینار بۆ خولا كوردستانێ خەرجكرن
د داخویانیەكێ دا ئەندامێ ئێكەتییا تەپا پا پێی یا كوردستانێ دیار كر سەرۆكێ حوكمەتا هەرێمێ مەسرۆر بارزانی رازەمەندی ل سەر خەرجكرنا كۆژمەیێ 859 ملیۆن دینار بۆ شایستەیێ وەرزێ بوری یێ دادڤان و سەرپەرشتیارێن خولان و بۆ وەرزێ ئەڤ سالە ژی یێ لاوان و تازەپێگەهشتییان.
زێدەتر ئازاد محەمەد بۆ رۆژنامەیا ئەڤرۆ گۆت: ب سۆپاسی ڤە سەرۆكێ حوكمەتا هەرێما كوردستانێ پشتەڤانییا خوە یا دارایی بۆ چالاكیێن مە یێن وەرزشی ل سەر ئاستێ كوردستانێ ب رازەمەندی بۆ خەرجكرنا 859 ملیۆن دیناران دایە كو دێ ل سەر ئەوان دادڤان و سەرپەرشتیارێن چالاكی ب رێڤەبرین ل وەرزێ بوری د خولێن پلا نایاب، ئێك، دو، فوتسال و كۆپا كوردستانێ و خولا لاوان و یا نوكە ژی تازەپێگەهشتییان، ئەڤ رازەمەندییە وەكو پالدەرەكێ مەزن و ب هێز بۆ پێشئێخستن و بلندكرنا ئاستێ وەرزشێ هاتییە و ئەڤ پێنگەڤە ژی نە بوو جارا ئێكێ یە بەلكو بەردەوام پشتەڤانییا ئێكەتییا تەپا پێی و وەرزشا كوردستانێ دكەت.
ل دووڤ راگەهاندنا رێڤەبەرییا گشتی یا وەرزشی ل هەرێمێ كو ژلایێ خوەڤە ژی ئەوان نڤێسارێن فەرمی بۆ مەسرۆر بارزانی سەرۆكێ حوكمەتا هەرێما كوردستانێ هنارتبوون و دیاركرن ئەو كۆژمەیێ هاتییە تەرخانكرن دێ ب ڤی شێوەیێ خوار هێتە بەلاڤكرن، كۆژمەیێ 588 ملیۆنو 670 هزار دینار بۆ خەرجكرنا وەرزێ بوری یێ 2022- 2023ێ یێن خولا پلا نایاب، ئێك، دو، كۆپا كوردستانێ و فوتسال، دیسان بۆ راهێنەر و سەرپەرشتێن یاریان و دیسان بۆ دەرمالێن ئەندام، كارمەند، كرینا چلۆبەرگێن وەرزشی هاتینە تەرخانكرن.
دیسان راگەهاندنا ناڤهاتی ئەوچەندە ژی دیار كر 270 ملیۆن و 800 هزار دینار بۆ هەمان وەرزە ل سەر ئاستێ لاوان و تازەپێگەهشتییان كو نوكە ئەڤ خولە بەردەوامن و دێ بۆ هەموو دادڤان و سەرپەرشتییارێن یارییان بن و رێڤەبەرێ وەرزشی ل هەرێما كوردستانێ سەردار ئیسماعیل خوەشحالییا خوە دیار كرییە كو بەردەوام سەرۆكێ حوكمەتێ پشتەڤانێ وەرزشا كوردستانێ یە و ئەڤجارە ژی ب رێیا رێڤەبەرییا وەرزشی یا هەرێمێ رازیبوویە پشتەڤانییا دارایی بۆ خولا كوردستانێ بكەت.
