سەرۆکێ فرەنسا هۆشداریێ ددەتە ئسرائیلێ
ئیمانوێل ماکرۆن سەرۆکێ فرەنسا د داخۆیانیەکێ دا راگەهاند، هەکە ئسرائیل ل سەر هەلوەستێ خوە یێ نها بەردەوام بیت و ئێرشێن خوە نەدەتە راگرتن دێ ئەنجامێن وێ یەکێ بۆ ئسرائیلێ گەلەک گران بن، چونکی کوشتنا وەلاتیێن سڤیل تاوانە و هەکە سەرۆک وەزیرێن ئسرائیلێ بنیامین نەتانیاهۆ کار بۆ راگرتنا شەڕی نەکەت دبیت وەکو تاوانبارەکێ شەڕی کار بۆ دادگەهیکرنا وی بهێتە کرن و ئەو یەک د بەرژەوەندیا ئسرائیلێ دا نینە و باشترە نەتانیاهۆ داخوازا جڤاکێ نێڤدەولەتی یا بۆ راگرتنا شەڕێ نها قەبوول بکەت.
سەرۆکێ فرەنسا ئەو یەک ژی دیار کر، ئەمریکا، ئێکەتیا ئۆرۆپا و نەتەوەیێن ئێکگرتی بەری نها ژی ل دۆر ئەنجامێن شەڕی و کوشتنا وەلاتیێن سڤیل هۆشداری داینە سەرۆک وەزیرێن ئسرائیلێ، لێ مخابن هەتا نها ژی سەرۆک وەزیرێن ئسرائیلێ یێ رژدە کو بەردەوامیێ بدەتە شەڕی، ئەو یەک ژی دێ ئەنجامێن گەلەک خراب بۆ ئسرائیلێ و بنیامین نەتانیاهۆی هەبن، چونکی بەردەوامیا شەڕی و کوشتنا وەلاتیێن سڤیل رامانا تاوانێن شەڕی یە.
