سەرەڕای ئاگربەستێ لێ مەترسیا شەڕی ژی یا هەی
چاڤدێرێن سیاسی دیار دکەن ئاگربەستا نها هاتیە کرن رامانا ڤێ یەکێ نادەت دێ رێککەفتن هێتە کرن، چونکی هێشتا ژی ناکۆکیێن گەلەک مەزن د ناڤبەرا ئیرانێ و ئەمریکا دا هەنە و ژ بەر ڤێ یەکێ ژی مەترسیا دوبارەبوونا شەڕی یا هەی.
د. مەجید حەقی بسپۆرێ کاروبارێن سیاسی یێ کورد ل وەلاتێ فنلەندا دیار کر، راگرتنا شەڕی بۆ دەمێ دو حەفتیان ل سەر داخوازا ئیرانێ بوویە و ب رێیا پاکستانێ بۆ بەرپرسێن ئەمریکا هاتیە دیار کرن، بێگون درێژبوونا شەڕی د بەرژەوەندیا ئەمریکا دا نەبوو و فشارێن ئابووری یێن گەلەک مەزن ل سەر ئەمریکا هەبوون و ژ بەر ڤێ یەکێ ژی بریارا راگرتنا شەڕی ژ ئالیێ ترامپی ڤە هاتە پەسەند کرن، ب تایبەتی ژی بابەتێ هنارتنا وزێ بۆ بازارێن جیهانێ گەلەک گرنگ و ستراتیژیە و ژ بەر ڤێ یەکێ ژی ئەمریکا رازی بوویە شەڕ بۆ دەمێ دو حەفتیان بهێتە راگرتن و گۆت: (راستە بەرپرسێن ئیرانێ راگرتنا شەڕی بۆ خوە وەکو سەرکەفتن دبینن و ئەو یەک ژی تشتەک ئاسایی یە، چونکی بەرپرسێن ئیرانێ نەشێن هەموو تشتان ب رەنگەکێ ئاشکرا بۆ خەلکێ خوە بێژن و ل ئالیێ دی مەترسیا خوەنیشادانان ژی هەیە و ژ بەر ڤێ یەکێ ژی هەتا ژ دەستێ بەرپرسێن ئیرانێ بهێت دێ راگرتنا شەڕی وەکو شکەستا ئەمریکا دەنە دیار کرن).
ناڤهاتی ئەو یەک ژی دیار کر، گەلەک باش بوو کو کوردێن رۆژهەلاتێ کوردستانێ نەبوونە پشکەک ژ شەڕی و د رەوشا نها دا کو رژێما ئیرانێ گەلەک لاواز بوویە دێ گوهۆڕینێن مەزن ل ئیرانێ روو دەن، چونکی زیانێن گەلەک مەزن گەهشتینە ژێرخانا ئابووری و سەربازی یا ئیرانێ و پرانیا فەرماندارێن کاریگەر یێن ئیرانێ ژی هاتینە کوشتن، هەکە رژێما نها دەست ب چاکسازیان نەکەت و ب تایبەتی ژی رەوشا ئابووری یا ئیرانێ باش نەکەت دێ خەلک ل دژی رژێمێ دەست ب خوەنیشادانان کەن، نها رژێم لاوازە و هەکە چاکسازیان بکەت رەنگە بشێت بۆ دەمەکێ دی ژیێ خوە درێژ بکەت.
ل ئالیێ دی مەنسور عەزیزی چاڤدێرێ سیاسی ژی دیار کر، مەترسیا دوبارەبوونا شەڕی یا هەی، چونکی تشتێ ئەمریکا و ئسرائیلێ دخواستن هەتا نها بدەستڤە نەئیناینە و ل ئالیێ دی دەستهەلاتا نها یا ئیرانێ ژی وەسا هزر دکەت کو یا سەرکەفتی یە، چونکی بەرپرسێن ئیرانێ ب هەموو رەنگەکێ کار بۆ مانا رژێما خوە دکرن و نها رژێم مایە و ئەو یەک بۆ وان سەرکەفتنە، لێ راستیەک هەیە رژێما ئیرانێ گەلەک لاواز بوویە و گۆت: (هەکە بەرپرسێن ئیرانێ هەموو داخوازیێن ئەمریکا قەبوول بکەن و ب تایبەتی ژی یۆرانیۆما هەی رادەست بکەن دبیت رەوشەکا دی بهێتە پێش، لێ هەکە بەرپرسێن ئیرانێ ل سەر سیاسەتا خوە یا نها ل هەمبەر ئەمریکا و ئسرائیلێ بەردەوام بن و کار بۆ دروستکرنا چەکێ ئەتۆمی بکەن بێگومان دانوستاندنێن ل پاکستانێ ژی دێ بێ ئەنجام بن و دیارە د دەمەکێ وەسا دا دێ جارەکا دی شەڕ دەستپێکەت).
ناڤهاتی ئەو یەک ژی دیار کر، دەستهەلاتا نها یا ئیرانێ گەلەک لاواز بوویە و هەکە پرسا کوردی و پرسێن دی چارەسەر بکەت بێگومان دێ شانسێ مانا وێ رژێمێ زێدەتر بیت، لێ هەکە بەردەوامیێ بدەتە سیاسەتا خوە یا سەرکوتکرنا کوردان و نەتەوەیێن دی، دبیت خوەنیشادانێن مەزن ژی ل ئیرانێ دەستپێ بکەن، چونکی نها کورد و نەتەوەیێن دی یێن کو ب سالانە دهێنە تەپەسەرکرن هەست دکەن دەستهەلاتا ئیرانێ لاواز بوویە، هەروەسا دڤێت ژبیر نەکەین بەری دو مەهان نێزیکی ٥٠ هزار کەس ل ئیرانێ هاتینە کوشتن ئانکو کینەک مەزن ل دژی دەستهەلاتێ هەیە و ئەو یەک ژی دشێت ببیتە ئەگەرێ ئالۆزیێن گەلەک مەزن بۆ دەستهەلاتێ.
عەبدوللا حیجاب چاڤدێرێ سیاسی ل وەلاتێ نەرویج ژی دیار کر، راگرتنا شەڕی بۆ دەمێ دو حەفتیان رامانا رێککەفتنێ و چارەسەریێ نینە، چونکی هێشتا پرسێن مەزن و سەرەکی د ناڤبەرا ئەمریکا و ئیرانێ دا وەکو خوە ماینە، ئەمریکا دەمێ ئێرشی ئیرانێ کری ژی وی دەمی ترامپی دیار کر ئارمانجا وان گوهۆڕینا رژێما ئیرانێ نینە، ئانکو دڤێت گەلێ ئیرانێ رژێمێ بگوهۆڕن، راستە نها رژێما ئیرانێ گەلەک لاواز بوویە، لێ هەر چاوا بیت دڤێت خەلکێ ئیرانێ بریارا خوە بدەن و گۆت: (هەکە رێککەفتن ژی د ناڤبەرا ئیرانێ و ئەمریکا دا بهێتە کرن ئەو یەک رامانا ئاشتیێ و ب دووماهی ئینانا هەر پرسەکێ نینە، چونکی دەمێ شەڕ نەمینیت دێ نەرازیبوونێن ناڤخوەیی ل هەمبەر دەستهەلاتێ روو دەن، ژ بەر ڤێ یەکێ ژی گەلەک ژ بەرپرسێن ئیرانێ ل گەل راگرتنا شەڕی نەبوون).
ناڤهاتی ئەو یەک ژی دیار کر، ئەمریکا و ئسرائیل باش دزانن هەکە رێگریێ ل ئیرانێ نەکەن ئیران دشێت د پاشەرۆژێ دا چەکێ ئەتۆمی ژی دروست بکەت و ببیتە مەترسیەکا گەلەک مەزن بۆ ئەمریکا و هەڤپەیمانێن وێ، ژ بەر ڤێ یەکێ ژی دڤێت ئەم چاڤەرێ بین کا دێ ئەنجامێ دانوستاندنێن ل پاکستانێ چ بیت و هەکە ئیرانێ هەموو مەرجێن ئەمریکا قەبوول کرن وی دەمی ئانکو ئیرانێ خوە راست کریە و هەکە رەت بکەت بێگومان دێ جارەکا دی ئێرشی ئیرانێ هێتە کرن.
