سەفەر جەعفەر: دەركرنا رێنماییان ژبۆ رێكخستنا ئەكادیمیێن وەرزشی نە و نەهێلانا بەرەلاییێ
د داخویانیەكێ دا رێڤەبەرێ رێڤەبەرییا وەرزشی ل پارێزگەها دهۆكێ دیار كر ئەو پرۆژەیێ رێكخستن و فەرمیكرنا تایبەت یا ئەكادیمیێن وەرزشی گەهشتییە قۆناغێن دووماهیێ و ئەم چاڤەڕێ رێنما و راسپاردەیێن رێڤەبەرییا گشتی یا وەرزشی ل هەرێما كوردستانێ نە ژبۆ كار پێكرنێ ل پارێزگەهێ.
زێدەتر سەفەر جەعفەر گۆت: دەركرنا رێنمایێن نوو پێخەمەت رێكخستنا كارێ ئەكادیمیێن وەرزشی و هەر فیرگەه یان خولێن هاڤینێ ل كوردستانێ و نەهێلانا بەرەلایێ و ئەڤ رێنماییە دێ ژ رێڤەبەرییا گشتی یا وەرزشی ل هەرێما كوردستانێ هێنە دەركرن و بۆ هەموو رێڤەبەریێن پارێزگەهان هێنە هنارتن ژبۆ كار پێكرنێ پشتی هەر رێڤەبەرییەكێ ب چەند خالان بووچوونێن خوە پێشكێشی رێڤەبەرییا گشتی كرین، وەكو رێڤەبەرێ وەرزشی ل پارێزگەها دهۆك مە نێزیكی 18 خال و 11 پێشنیار د كۆمبوونا رێڤەبەرییان یا تایبەت ب دانانا رێنمایێن ئەكادیمییان پێشكێش كربوون ئەوا ب بوویە جهێ پووتەدان و رازیبوونا كەسێن د ناڤ كۆمبوونێ دا.
هەروەسان ناڤهاتی گۆت: ژ خال و پێشنییارێن د ناڤ كۆمبوونێ دا مە بەرهەڤكرین ئەو ژی دڤێت ئەكادیمیێن وەرزشی سەر ب یانەیان ڤە بن و ئەڤ یانە ژی ئۆتۆماتیكی ب رێڤەبەرییا مە ڤە گرێداینە لەوما مۆلەت ژ رێڤەبەریێ بهێتە دان، ئەو راهێنەر یان چارەسەرێ تەندرۆستی د ناڤ ئەكادیمیێ دا دڤێت خودان باوەرنامە بیت و یێ باوەرپێكری بیت پێخەمەت بشێن سنۆرەكی بۆ ئەوان ئەكادیمیێن ل دووڤ رێنمایێن رێڤەبەرییا گشتی یا وەرزشی نەچن ب راوەستینن، هەروەسان وەكو پێشنییار مە كرییە دڤێت سێ جۆرێن ئەكادیمییان هەبن ئێك گرێدایی ب یانەیان بن، یا دویێ وەبەرهێنانێ و كەرتێ تایبەت بیت، یا سێیێ هەڤپشك بیت دناڤبەرا یانە و وەبەرهێنەری بیت.
ژلایەكێ دووڤە سەفەر جەعفەر دیار كر ئێك ژ خالێن ئە وان دخوازكرییە مولەتێن فەرمی یێن یاریێن لەشجوانی، چەستەیی، مەلەڤانی، یاریێن جەنكی و بلیارد ژلایێ وان ڤە بهێنە دان و گۆت: ل پارێزگەها دهۆكێ 33 ئەكادیمی هەنە بتنێ دەهـ ب مۆلەتا رێڤەبەرییا مە دەستیرداینە، هندەك ژ ئەوان ئەكادیمیا نە یاریگەها بچووك و نە یا مەزن نینن، ئاریشەیا مە ل پارێزگەها دهۆكێ تیمێن تازەپێگەهشتییان ل یانەیان نینن لڤێرە ژی رۆلێ ئەكادیمیان دیار نابیت، نە یا دروستە زانكویا دهۆك ژی ئەكادیمیان ڤەكەت، لەوما گەلەك پێشنیارێن دی ژی مە داناینە ل بەر سینگێ بەرهەڤبوویان ژبۆ دانانا پرۆژەیێ ئەكادیمیان كو پێشبینی دكەم گەهشتییە قۆناغێن دووماهیێ ب هیڤییا وێ یەكێ ئەڤ پێنگاڤە ب شێوەكێ رێكخستی ب كەڤیتە د خزمەتا وەرزشڤانێن پارێزگەهێ و كوردستانێ و ب شێوەیێ زانستی و ئەكادیمی وەرزشا كوردستانێ ب گشتی پێشمەڤیت.
